Zuwa Yanzu dai labari ya gama watsuwa na rasuwar tsohon Sarkin Musulmi mai murabus Alhaji Ibrahim Dasuki.
Marigayi Ibrahim Dasuki
Idan za’a iya tunawa marigayi Ibrahim Dasuki dai shine mahaifin tsohon mai maiwa tsohon shugaban kasa shawara akan harkokin tsaro Kanal Sambo Dasuki mai murabus wanda ke daure sama da shekara daya kan zarginsa da ake yi da laifin karkatar da kudaden siyan makamai.
Marigayi Ibrahim Dasuki ya rasu ne a jiya Litinin 14 ga watan Nuwamba a wani asibiti dake garin Abuja yana da shekaru 93, kuma za’a binne shi a Hubbaren Shehu Usman Fodio dake garin Sakkwato da misalin karfe biyu na ranar Talata 15 ga watan Nuwamba.
Sai dai abin tambaya a nan shine, shin gwamnati zata kyale Dasuki halartan Jana’izar maihaifinsa? Ko ta’aziyya?
KU KARANTA:Abubuwa 5 game da marigayi Ibrahim Dasuki
Yan Najeriya da dama sun tattauna wannan batun musamman saboda labarin daya watsu a tsakanin jama’ar kasar nan wanda ke cewa Sambo Dasuki ne jagoran Sojojin da suka kama shugaban kasa Muhammadu Buhari yayin da aka yi masa juyin mulki a zamanin yana shugaban mulkin soja.
Bugu da kari labarin ya cigaba da bayyana cewar yayin da Buhari ke daure a hannun gwamnatin Babangida sai mahaifiyarsa ta rasu, inda yayi ta magiyar a bashi ko awa guda ya samu halartan jana’izar ta ko kuma yaje ta’aziyya, amma gwamnatin wannan lokacin ta Babangida tayi mursisi ta hana shi.
Abinka da rayuwa, Duniya juyi juyi, sai gashi a yau Mahaifin Sambo Dasuki, Ibrahim Dasuki ya rasu, hakan ya sanya yan Najeriya ke bayyana mabanbanta ra’ayoyi dangane da batun.
Kanal Abdulmuminu Aminu
Sai dai tsohon soja, kuma tsohon gwamnan jihar Borno a zamanin mulkin Soja kanal Abdulmuminu Aminu ya musanta batun cewa wai Dasuki ne ya jagoranci kama shugaban kasa Muhammadu Buhari a wancan lokacin. Abdulmuminu ya bayyana haka ne cikin wata hira da yayi da jaridar Daily Trust a ranar 9 ga watan Agustan 2016.
Kanal Abdulmuminu yace babu Dasuki cikin wadanda suka kama shugaba Buhari, asali ma su uku ne suka kamo shi a wancan lokaci.
Kanal Abdulmuminu mai murabus yace “ni ne na jagoranci tawagar data kama shugaban kasa Muhammadu Buhari yayin juyin mulkin 1985. Na isa barikin Soja na Dodan tare da Manjo John Madaki, tare da Lawan Gwadabe. Ni da kai na na hau saman bene na kamo shi.”
A wani labarin kuma shugaba Buhari ya mika ta’aziyyarsa ga iyalan Alhaji Ibrahim Dasuki, ta’aziyyar ta fito ne ta bakin mai taimaka sa a fannin watsa labarai Femi Adesina inda yace “Shugaba Buhari na mika ta’aziyyarsa ga iyalan Ibrahim Dasuki, masarautan Sakkwato , gwamnatin jihar Sakkwato da al’ummar jihar gabaki daya”.
Daga karshe shugaban yace ba za’a manta da marigayi Ibrahim Dasuki ba musamman saboda irin rawar daya taka wajen zamanantar da masarautun gargajiya tare da kokarinsa wajen samar da kanan hukumomi.
The post Shin Buhari zai kyale Dasuki yaje ta’aziyyar Mahaifinsa? appeared first on Nigeria News today & Breaking news | Read Naij.com 24/7.