Қазақстан аз зерттелген аумақтардан мұнай мен газ іздейді
Қазақстанда аз зерттелген, бірақ мұнай мен газға қатысты перспективасы жоғары шөгінді бассейндер аумағында қазба жұмыстарын жүргізу жоспарланған. Бұл туралы өнеркәсіп және құрылыс министрі Ерсайын Нағаспаев мәлімдеді, - деп хабарлайды Tengrinews.kz тілшісі.
Министрдің айтуынша, әңгіме еліміздің оңтүстік-шығыс және солтүстік өңірлері туралы болып отыр.
"Шу-Сарысу және Солтүстік Торғай секілді аз зерттелген шөгінді бассейндер шегінде сейсмикалық барлау жұмыстарын жүргізу жоспарланған. Алынған нәтижелер егжей-тегжейлі іздестіру және барлау жұмыстарын бастауға негіз болады деп күтіліп отыр", - деді Нағаспаев Астанада өткен геологиялық форумда.
Министрдің сөзіне қарағанда, Қазақстанда 10 мыңға жуық кен орны есепке алынған, оның ішінде 1 мыңнан астам қатты пайдалы қазбалар кен орны, 359 көмірсутек кен орны, 3 700-ден астам кең таралған пайдалы қазбалар нысаны және 4 900-ге жуық жерасты су көздері бар.
Бүгінде Қазақстанда мұнай негізінен ірі кен орындары мен негізгі инфрақұрылым шоғырланған елдің батысында өндіріледі. Негізгі мұнай өндіруші өңірлер - Атырау, Маңғыстау, Батыс Қазақстан және Ақтөбе облыстары. Сондай-ақ Қызылорда облысында да өндіру көлемі аз емес.
Еске салсақ, бұған дейін үкіметте 2025 жылы кешенді геологиялық барлау жұмыстарын жүргізуге резервтен бөлінген 40,7 миллиард теңге туралы хабарланған болатын.