Израиль алғаш рет Иранның мұнай қоймаларына шабуыл жасады
Израиль қорғаныс армиясы (ЦАХАЛ) 7 наурызда Иранның мұнай инфрақұрылымына алғашқы әуе соққылары жасалғанын айтты. ЦАХАЛ өкілінің айтуынша, Тегеранда кемінде 30 мұнай қоймасы нысанаға алынған, - деп хабарлайды Tengrinews.kz тілшісі The Times of Israel басылымына сілтеме жасап.
Иран Мұнай министрлігінің өкілі ирандық Fars агенттігіне Тегеран мен оған көршілес Кередж қаласында үш мұнай қоймасы шабуылға ұшырағанын растады. IRNA агенттігінің нақтылауынша, осы қоймалардың екеуі Иран астанасының оңтүстігіндегі ірі мұнай өңдеу зауытының маңында орналасқан, алайда зауыт зақымданбаған.
Ислам революциясы сақшылар корпусы жауап ретінде Израильдің Хайфа қаласындағы мұнай өңдеу зауытына зымыран соққысын жасағанын мәлімдеді. Алайда бұл ақпаратты Израиль тарапы растаған жоқ.
Осы арада CNN телеарнасы Израильдің Ирандағы мұнай қоймаларына жасаған соққылары қақтығыстың келесі кезеңінің бір бөлігі екенін хабарлады.
"Израиль соғыстың келесі кезеңі аясында Ирандағы мұнай қоймаларына соққы жасай бастады", - деді телеарнаға Израильдегі дереккөз.
Израиль премьер-министрі Биньямин Нетаньяху сенбіде АҚШ пен Израильдің Иранға жасаған бомбалау операциясы қалыпты режимде жалғасатынын және ирандықтар өз үкіметін құлатуы мүмкін сәті жақындап келе жатқанын мәлімдеді.
Сондай-ақ, Нетаньяху ирандық күштік құрылым өкілдеріне үндеу жасап, қаруын тастағандарға ешқандай зиян келмейтінін айтты.
Сілтемесіз жаңалық оқисыз ба? Онда Telegram желісінде парақшамызға тіркеліңіз!