Оңтүстік Кореяда 29 желтоқсанда Муан әуежайында апатқа ұшыраған Jeju Air авиакомпаниясының ұшағындағы екі борттық жазу құрылғысының бірінен деректер алынды, - деп хабарлайды The Hankyoreh басылымына сілтеме жасап Tengrinews.kz.
Сөз ұшқыштар кабинасында орнатылған өздігінен жазатын құрылғы жайлы болып отыр. Бұл құрылғы ұшқыш пен әуе диспетчері арасындағы әңгімелерді жазған.
"Ұшқыштар кабинасындағы әңгімелерді тіркейтін дыбыстық жазу құрылғысынан деректер алу аяқталды. Бүгін оларды дыбыстық файлдарға түрлендіру жұмыстары басталды", – деп мәлімдеді Оңтүстік Корея Көлік министрлігінің Азаматтық авиация департаментінің директоры Чжу Чжон Ван.
Әңгімелерде құсқа соқтығысу салдарынан қозғалтқыштың зақымдануы, басқару тетіктерінің жұмыс істемеу деңгейі және қону тетіктерінің істен шығуы салдарынан болған апат туралы ақпарат болуы мүмкін деген болжам бар. Сарапшылар екінші жазу құрылғысының зақымдануы ондағы жазылған деректердің сақталуына әсер етпегенін анықтады. Ел билігі қара жәшіктерді талдауды жылдамдататынын, олардың апат себебін ашуда негізгі кілт екенін атап өтті.
Еске салсақ, Jeju Air авиакомпаниясының Boeing 737-800 ұшағы Бангкоктен Муанға рейс орындап, 29 желтоқсанда Муан әуежайына қонған кезде апатқа ұшырады. Апат жергілікті уақытпен таңғы 9:07-де болды. Ұшақ ұшу-қону жолағынан өтіп кетіп, қоршауға соғылған. Кейін өрт шыққан.
Бортта 181 адам болған. Олардың екеуі аман қалған – экипаж мүшелері, бір әйел мен бір ер адам. Олар орташа және ауыр жарақат алған, қазір ауруханаларға жеткізілді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
