Ақтөбе облысының қылмыстық істер жөніндегі мамандандырылған соты сегіз қазақстандықтың өліміне себепкер болған 37 жастағы шетел азаматына үкім шығарды, - деп хабарлайды Tengrinews.kz тілшісі.
Сот 37 жастағы Беларусь азаматы – қарсы жолаққа шығып, шағын автобуспен соқтығысқан жүк көлігі жүргізушісінің ісін қарады. Жол апатынан 8 адам қаза тапқан. Оқиға 2024 жылғы 7 тамызда Ақтөбе облысындағы Самара – Шымкент тасжолында болған. Toyota Ipsum салонында бес оқушы мен үш ересек адам болған.
Сот үкімі бойынша
Іс бойынша ауырлататын мән-жайлар анықталмаған, сот сотталушының кәмелетке толмаған балаларының бар екенін ескеріп, ең төменгі жазаны тағайындады.
"С. есімді азаматты ҚР ҚК-нің 345-бабы 4-бөлігінде көзделген қылмыстық құқық бұзушылық жасағаны үшін кінәлі деп танылсын және оған 5 жыл мерзімге бас бостандығынан айыру, сондай-ақ 7 жыл мерзімге көлік құралдарын басқару құқығынан айыру жазасы тағайындалсын. Жазасын қылмыстық-атқару жүйесінің қауіпсіздігі төмен мекемесінде өтеу белгіленсін," – деп үкімді оқыды судья Алтынбек Сабыров.
Моральдық өтемақы
Сотталушы қаза тапқандардың туыстарына моральдық зиян ретінде 20 миллион теңге төлеуге міндеттелді. Қалған бес зардап шегушіге 7 миллион теңгеден өтемақы төленуі тиіс.
Апелляция туралы
Журналистердің "Бұл іс бойынша апелляция беріле ме?" деген сұрағына сотталған Беларусь азаматы жауап бермеді. Үкім әлі заңды күшіне енген жоқ.
Соңғы сөз
18 желтоқсанда сотталушы соңғы сөзінде кінәсін мойындап, қаза тапқандардың туыстарынан кешірім сұрады.
"Сіздерге шын жүректен көңіл айтқым келеді. Қайғыларыңызға ортақтасып, қолдау білдіргім келеді. Шын жүректен кешірім сұраймын. Бұл қайғылы жағдай мәңгі есімде қалады. Осы оқиға туралы ойламаған күнім болған жоқ. Бұл қайғы тек қасірет пен бақытсыздық әкелді. Мен бұған өте өкініш білдіремін," – деді сотталушы.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
