Жетісу облысы прокуратурасының үйлестіруімен полиция интернационалдық алаяқтар тобының жолын кесті, - деп хабарлайды Tengrinews.kz тілшісі.
4 адамнан тұратын топ, шетелдік азаматтармен бірлесе отырып, облыстың жүзден аса тұрғынын алдаған, олар 100 миллион теңгеден астам шығынға ұшырады.
"Қылмыстық ниеттеріне қолжеткізу үшін олар әртүрлі алдау схемалары мен заманауи технологияларды, яғни қашықтан қолжеткізу қолданбаларын (AnyDesk, Kenguru, Teamviewer) және т.б. пайдаланды. Топтың өзінің "Қолма-қол ақша шешу орталығы" бар, ол дропперлерді пайдаланып, қаражатты криптовалютаға аударып отырған", - делінген хабарламада.
Олардың тұрғылықты жерін тінту кезінде 35 ұялы телефон, 3 жүйелік блок, 3 ноутбук, 2 пневматикалық тапанша және қымбат нөмірлері бар 3 люкс көлік тәркіленген.
"Топтың 4 мүшесіне қатысты соталды тергеп-тексеру жүргізіліп жатыр, қазіргі уақытта олар қамауға алынды. Қылмыс жасағаны үшін күдіктілер мүлкін тәркілей отырып, жеті жылға дейін бас бостандығынан айыру түріндегі жазаға тартылуы мүмкін", - делінген хабарламада.
Жетісу облысы прокуратурасы азаматтарға алаяқтықтың құрбаны болмауды, басқа тұлғаларға жеке деректерді немесе банк шотының мәліметтерін беруден бас тартуы керектігін ескертті.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
