Энергетика министрі Алмасадам Сәтқалиев мұнай өндіру көлемдері жоспарланғаннан төмен болғанын айтты, - деп хабарлайды Tengrinews.kz тілшісі.
Министр бұл жағдайдың себептерін атады.
"10 айдың қорытындысы бойынша мұнай өндіру көлемі 73,5 миллион тонна болды. Биылға арналған өндіріс болжамы – 88,4 миллион тонна. Өндірістің жоспармен салыстырғанда төмендеуі Теңіз және Қашаған сияқты ірі кен орындарында күрделі жөндеу жұмыстарының жүргізілуімен байланысты", – деді Сәтқалиев Мәжілістегі үкімет сағатында.
Сонымен қатар, шенеуніктің айтуынша, өндірістің төмендеуіне Қарашығанақ кен орнында жоспардан тыс тоқтаулар және Орынбор газ өңдеу зауытының газ қабылдаудағы шектеулері әсер еткен.
"Өндіру деңгейінің төмендеуіне ОПЕК+ келісімі шеңберіндегі міндеттемелерді орындау да әсер етеді. Қазақстан ОПЕК+ келісіміне қатысады. Қазақстан үшін, басқа елдер сияқты, 2024 жылға белгілі бір міндеттемелер қойылған. Келісім шарттарын орындау әлемдік мұнай нарығындағы тұрақтылықты сақтау үшін қажет", – деп еске салды министр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
