Жамбыл облысының әкімі Ербол Қарашөкеевтің төрағалығымен өткен кезекті аппараттық кеңесте байланыс сапасын жақсарту мәселелері талқыланды.
Басқосуда цифрлық технологиялар басқармасының басшысы Руслан Ноқрабеков елді мекендерді мобильді байланыс және интернет желісімен қамтамасыз ету бойынша есеп берді.
Бүгінгі таңда өңірдегі 367 елді мекеннің 50-і 2G, 69-ы 3G, 248-і 4G мобильді интернетімен қамтамасыз етілген. Талшықты-оптикалық байланыс желісі 371 елді мекеннің 199-на тартылған.
2023-2024 жылдары «Қолжетімді интернет» ұлттық жобасы аясында мобильді операторлар тарапынан 180 елді мекенге 4G базалық станциясын орнату жоспарланған. Бүгінгі таңда 72 елді мекенде тиісті жұмыстар атқарылып отыр.
Ұлттық жобаға сәйкес, 2024-2027 жылдары аралығында өңірдің 170 елді мекені мен сол елді мекенде орналасқан 455 мемлекеттік мекемені талшықты-оптикалық байланыс желісімен қамту жоспарға енгізілген. Ағымдағы жылы 30 елді мекен мен 144 мемлекеттік мекемеде жұмыстар жүргізілетін болады.
Биыл республикалық маңызы бар автомобиль жолдарының бойына 7 антенна-діңгек (АД) орнату жоспарланған. Атап айтқанда, Қордайда – 3 АД, Жуалыда – 1 АД, Меркіде – 1 АД, Т.Рысқұловта – 2 АД орнатылады. Нәтижесінде 449,8 шақырым автожол бойы мобильді интернетпен қамтылады.
Сонымен қатар жергілікті атқарушы органдар антенна-діңгек құрылысы және электр желісімен қамтамасыз еткен жағдайда 28 елді мекенді 4G мобильді байланысымен қамтамасыз ету көзделуде.
Ербол Қарашөкеев өңірдегі елді мекендерді мобильді және талшықты-оптикалық байланыс желілерімен қамту мәселесі әлі де өзекті екенін атап өтті.
Сондай-ақ 180 елді мекеннің 72-де ғана базалық станция орнатылғанын айта келе, жауаптылардың сылбыр жұмысын сынға алды.
— Тұрғындар тарапынан байланыс пен интернет сапасына қатысты жиі шағым түседі.
Шалғайдағы елді мекендерді былай қойғанда, облыс орталығы Тараз қаласының аумағында ұялы байланыс және интернетпен қамту мәселесі бар.
Қазір елді мекендерді байланыс желілерімен қамтамасыз ету бойынша қандайда бір қорытынды шығарып, баға беруге болмайды, – деген облыс әкімі туындаған өзекті мәселелерді күн тәртібіне шығарып, бақылауда ұстауды басқарма басшыларының есіне салды.
Антенна-діңгек орнатылатын аймақ әкімдеріне жұмыстарды кестеден кешіктірмей, мерзімінде берілуін қамтамасыз ету жүктелді.
Сондай-ақ базалық станциялар орнату жұмыстарына, елді мекендердегі ұялы байланыс және интернет сапасына зерделеу, жоспарланған шараларды мерзімінде атқару міндеті қойылды.
Соңғы жаңалықтар
Сообщение Жамбыл облысында 449,8 шақырым автожол мобильді интернетпен қамтылады появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.
