Алматыда Қаржы нарығын реттеу және дамыту агенттігі ғимаратының алдында несиелерін кешіруді сұраған халық жиналды, - деп хабарлайды Tengrinews.kz тілшісі.
9 желтоқсан күні Көктем-3 шағын ауданындағы агенттік кеңсесінің жанына 50-70 адам жиналды. Олар әлеуметтік желіде қазақстандықтарға несиелік амнистия берілетіні туралы ақпарат тарағаннан кейін жиналғандарын, өтініш бермек болғандарын айтады. Күннің екінші жартысында, өтініш жазғандардың саны 600-ден асқан.
Оқиға орнына Tengrinews.kz тілшісі де барды. Қазір ғимарат маңында полиция қызметкерлері кезекшілік етіп жүр. Арыз жазған азаматтар өтініштерін агенттікке беріп, кетіп жатқаны хабарланды. Дегенмен, ғимаратқа жаңа келіп өтініш жазып жатқан адамдар өте көп.
Адамдар ғимараттың айналасындағы барлық аллеяларға жиналған. Олар көліктердің капотына, орындық секілді түрлі жерлерге барып қолдарынан келгенше арыз жазып жатыр.
"Үш миллион теңге несием бар. Ақшалай алып балаларға құрылысқа бердім. Жоғары білімі бар, сауатты адам ретінде несиелік амнистия туралы ақпарат жалған екенін түсіндім. Алайда менде барлығымен бірдей арыз жазу үшін келдім. Бұл туралы WhatsApp-тан достарым жіюерді.
Түстен бері осында жүрміз, арыз жазып қойдым. Олардың айтуынша, жауап 15 күн ішінде жіберіледі", - дейді агенттік ғимаратына келгендердің бірі Қарлығаш есімді келіншек.
Тағы бір әйел WhatsApp-тан келген ақпаратқа сеніп, осында келгенін айтады.
"Бұл ақпарат маған да WhatsApp-тан келді, олар 15-не дейін келіп өтініш жазу керектігі айтылған. Бірақ осында келгенде бәрі өтірік екенін білдім. Ипотека төлеймін, қазіргі уақытта жұмыссызбын.
Бұл қаншалықты рас екенін білмеймін. Бірақ жағдайға байланысты арыз жазуды жөн көрдім. Өйткені өтірік болса, олар мәлімдемені қабылдамас еді", - дейді аты-жөнін жасырғысы келген әйел.
Жиналғандардың кейбірі агенттік ғимаратына қарама-қарсы орналасқан Қастеев мұражайының ғимаратына кіріп жылынып жатыр.
Қастеев атындағы мұражай ғимараты
Сілтемесіз жаңалық оқисыз ба? Онда Telegram желісінде парақшамызға тіркеліңіз!
