Нұр-Сұлтан қаласында куәгерлер жанып жатқан көліктен екі баланы құтқарды, деп хабарлайды Tengrinews.kz тілшісі төтенше жағдай комитетінің баспасөз қызметіне сілтеме жасап.
Оқыс оқиға 17 мамыр күні сағат 11:50-де Сарыарқа ауданы Ықылас Дүкенұлы көшесіндегі тұрғын үйдің ауласында болған. Онда Nissan-Terrano көлігінің қозғалтқышы өртке оранған. Оқиға орнына өрт сөндірушілер келгенше куәгерлер көліктегі 2014 және 2015 жылы туған екі баланы құтқарып үлгерген.
"Алдын ала болжам бойынша өрттің шығуына қозғалтқыштағы элект сымдарының қысқа тұйықталуы себеп болған. Өрт 12:02-де сөндірілді. Қаза тапқандар мен зардап шеккендер жоқ", - делінген хабарламада.
Өртті сөндіруге Нұр-Сұлтан қаласы төтенше жағдай департаментінің 12 қызметкері мен 2 техникасы жұмылдырылды.
