უკრაინის პრეზიდენტმა ვოლოდიმირ ზელენსკიმ განაცხადა, რომ მონაწილეობას მიიღებს უკრაინის თავდაცვის შესახებ საკონტაქტო ჯგუფის შეხვედრაში ე.წ. რამშტაინის ფორმატში. შეხვედრა გერმანიაში გაიმართება 9 იანვარს. ზელენსკის თქმით, იქ უკვე იმყოფება უკრაინის თავდაცვის მინისტრი რუსტემ უმეროვი.
საკონტაქტო ჯგუფმა თავდაცვის მინისტრებისა და სამხედრო მეთაურების დონეზე უნდა განიხილოს უკრაინის შემდგომი მხარდაჭერის სტრატეგია რუსული აგრესიის მოგერიებაში. უპირველეს ყოვლისა, ზელენსკიმ განაცხადა, რომ განიხილება საჰაერო თავდაცვის გაძლიერებისა და რუსული ავიაციის თავდასხმების მოგერიების საკითხები, ასევე 2025 წელს კოალიციის მუშაობის გეგმები.
როგორც Associated Press-ი იტყობინება, შეერთებული შტატები აპირებს, გამოაცხადოს უკრაინისთვის სამხედრო დახმარების დიდი პაკეტის გამოყოფა. ეს უკანასკნელი ასეთი პაკეტი იქნება შეერთებული შტატების ამჟამინდელი პრეზიდენტის, ჯო ბაიდენის ადმინისტრაციის მმართველობის პირობებში . ბაიდენი 20 იანვარს დატოვებს თანამდებობას. დახმარების პაკეტის ზუსტი მოცულობა უცნობია, მაგრამ, წყაროების თანახმად, ის მინიმუმ ორი მილიარდი დოლარი იქნება.
თავად „რამშტაინმა“ შეიძლება სერიოზული ცვლილებები განიცადოს მომავალ წელს. პოლონეთის თავდაცვის მინისტრმა ვლადისლავ კოსინიაკ-კამიშმა აღიარა, რომ იანვრის შეხვედრა შესაძლოა ამ ფორმატში ბოლო იყოს. მას შემდეგ, რაც შეერთებულ შტატებში მუშაობას შეუდგება ახალი ადმინისტრაცია დონალდ ტრამპის ხელმძღვანელობით, ის შეიძლება უკრაინის საერთაშორისო დახმარების სხვა ფორმების ინიციატივით გამოვიდეს.
უკრაინის თავდაცვის საკითხებზე საკონტაქტო ჯგუფი შეიქმნა აშშ-ის თავდაცვის მინისტრ ლოიდ ოსტინის ინიციატივით. ის ასევე დაესწრება ხუთშაბათის შეხვედრას, რათა პენტაგონის ხელმძღვანელის რანგში უკანასკნელად მიიღოს მონაწილეობა საკონტაქტო ჯგუფის მუშაობაში.
უკრაინის თავდაცვის საკონტაქტო ჯგუფი, რომელიც ასევე რამშტაინის ფორმატის სახელითაა ცნობილი, შეიქმნა 2022 წელს, რათა უკრაინის საერთაშორისო სამხედრო მხარდაჭერას გაუწიოს კოორდინაცია შეერთებული შტატების ეგიდით. ინიციატივა აერთიანებს მსოფლიოს 50-ზე მეტ ქვეყანას, რომელთა უმეტესობა ნატოს წევრია.
