აშშ-ის არჩეულმა პრეზიდენტმა დონალდ ტრამპმა კიდევ ერთხელ განაცხადა, რომ სურს უკრაინის ომის დასრულებაზე რუსეთთან მოლაპარაკება დაიწყოს მალევე, როგორც კი თეთრ სახლში დაბრუნდება, თუმცა არ დაუკონკრეტებია, როდის გაიმართება ის.
ტრამპმა თქვა, რომ მოლაპარაკებების მალე დაწყება სურს, რადგან "რუსეთი ბევრ ახალგაზრდას კარგავს, და ასევე - უკრაინაც".
ტრამპი ჟურნალისტებს ელაპარაკა ფლორიდაში, მარ-ა-ლაგოს მამულში. მას არ უთქვამს, რამდენად მალე შეხვდება რუსეთის პრეზიდენტს, ვლადიმირ პუტინს, თუმცა განაცხადა, რომ ასეთი შეხვედრის დანიშვნა სწორი არ იქნება 20 იანვრამდე, ანუ ტრამპის ინაუგურაციამდე.
"ამას ვერ გეტყვით, თუმცა ვიცი, რომ პუტინს შეხვედრა სურს", - განაცხადა ტრამპმა.
დეკემბრის ბოლოს კრემლის პრესმდივანმა დმიტრი პესკოვმა თქვა, რომ აშშ-ის და რუსეთის პრეზიდენტების შეხვედრის დანიშვნისთვის წინასწარი პირობები არ არსებობს.
საარჩევნო კამპანიისას ტრამპი ამბობდა, რომ უკრაინაში ომის დასრულებას გაპრეზიდენტებიდან 24 საათში შეძლებდა. პრესკონფერენციაზე მან იმედი გამოთქვა, რომ ბრძოლა ექვსი თვის ფარგლებში დამთავრდება.
"იმედი მაქვს, ეს მოხდება ექვს თვეზე ბევრად ადრე", - თქვა ტრამპმა.
პრესკონფერენციაზე მან ასევე განაცხადა, რომ აპირებს ვითარების "გამოსწორებას", თუმცა საკითხი "რთულია".
უკრაინის წარმომადგენლები შიშობენ, რომ სწრაფად ორგანიზებული მოლაპარაკების პირობებში რუსეთი შეძლებს შეინარჩუნოს მის მიერ დაკავებული უკრაინის ტერიტორია, და რომ, ამავე დროს, ეს რუსეთის არმიას დასვენების და ძალების მოკრების საშუალებას მისცემს.
უკრაინელებს სურთ, ტრამპმა გააგრძელოს აშშ-ის სამხედრო დახმარება მათი ქვეყნისთვის.
უკრაინის საგარეო საქმეთა მინისტრმა ანდრი სიბიჰამ 7 იანვარს გამოაცხადა, რომ უკრაინის და რუსეთის საკითხებში ტრამპის საგანგებო წარმომადგენლის უკრაინაში ვიზიტი გაუქმდა და უნდა გადაიდოს.
საგანგებო წარმომადგენელს, კით კელოგს, დავალებული აქვს უხელმძღვანელოს მოლაპარაკებებს, რომლებითაც ომი უნდა დასრულდეს.
