რუსეთის მუსლიმთა სასულიერო სამმართველოს ღვთისმეტყველთა საბჭომ უკან წაიღო მრავალცოლიანობის შესახებ გასულ კვირაში გამოცემული ფატვა.
ფატვა ეხებოდა რუსეთში მცხოვრებ მუსლიმან კაცთა უფლებას, ერთდროულად რამდენიმე ქორწინებაში ყოფილიყვნენ. მუსლიმებს ფატვის უკან წაღება მოუხდათ მას მერე, რაც რუსეთის გენერალურმა პროკურატურამ მუსლიმთა სამმართველოს ხელმძღვანელს, რავილ გაინუტდინს, მიმართა, აღკვეთილიყო კანონდარღვევა.
საბჭოს თავმჯდომარემ, შამილ ალიაუტლინოვმა ტელეგრამზე დაწერა, რომ ფატვის უკან წაღების მიზეზი იყო „რუსეთის გენერალური პროკურატურის და რუსეთის საზოგადოების რეაქცია“. „ეს ღვთის ნებაა და საბჭო ვერ ხედავს აზრს, კამათი დაიწყოს“, - აღნიშნა მან.
ეს ფატვა (საღვთისმეტყველო გადაწყვეტილება) - “რუსეთის ფედერაციის მუსლიმთა საზოგადოებაში მრავალცოლიანობის პრობლემატიკა” - მუსლიმთა რელიგიურ ქორწინებას ეხებოდა.
ფატვის თანახმად, კაცს შეუძლია ჰყავდეს რამდენიმე ცოლი მხოლოდ მაშინ, თუ შეუძლია ყველა ცოლთან თანაბარი ურთიერთობა უზრუნველყოს. ეს გულისხმობს ყველა ცოლის თანაბარ მატერიალური უზრუნველყოფას, თითოეული ცოლისთვის ცალკე საცხოვრებელს და მათთან თანაბარი დროის გატარებას შეთანხმებული გრაფიკით. თუ კაცს არ შეუძლია ამ მოთხოვნების შესრულება, მას ეკრძალება რამდენიმე რელიგიურ ქორწინებაში ყოფნა.
გამონაკლისი დაშვებულია, თუ პატარძალი „ნებაყოფლობით უარს იტყვის“ თავის უფლებებზე.
გენერალური პროკურატურის მიმართვა ეფუძნებოდა რუსეთის კანონს ოჯახის შესახებ.
