აშშ-ის არჩეულმა პრეზიდენტმა დონალდ ტრამპმა კონგრესს მოუწოდა, უარყოს დროებითი მთავრობის დაფინანსების კანონპროექტი, რომელიც უნდა მიღებულ იქნეს არაუგვიანეს 21 დეკემბრისა, იუწყება Reuters-ი. ეს ზრდის სამთავრობო უწყებების მუშაობის ნაწილობრივი შეჩერების ალბათობას.
„რესპუბლიკელებმა უნდა შეწყვიტონ პოლიტიკური თამაშები ამ ორპარტიულ შეთანხმებასთან, წინააღმდეგ შემთხვევაში ისინი დააზარალებენ შრომისმოყვარე ამერიკელებს და არასტაბილურობას შექმნიან მთელი ქვეყნის მასშტაბით“, - თქვა თეთრი სახლის პრესმდივანმა კარინ ჟან-პიერმა ტრამპის განცხადების კომენტირებისას. მისი თქმით, შეთანხმებაზე უარის თქმა შეწყვეტს დახმარებას ფერმერებისთვის და სტიქიით დაზარალებული თემებისთვის.
ტრამპმა და არჩეულმა ვიცე-პრეზიდენტმა ჯეი დი ვენსმა მოუწოდეს კონგრესს, მიიღოს ხარჯების შესახებ კიდევ ერთი დროებითი კანონპროექტი ნაცვლად ამჟამინდელი ტექსტისა, რომელსაც მათ უწოდეს „საჩუქრები დემოკრატებისთვის“. ტრამპმა ასევე მოითხოვა კანონპროექტის გამოყენება სახელმწიფო დავალიანების პრობლემის გადასაჭრელად.
ამან შეიძლება გაართულოს მცდელობები მთავრობის დახურვისა, რომელმაც შეიძლება დაარღვიოს სხვადასხვა სამსახურის მუშაობა - საჰაერო მიმოსვლით დაწყებული და სამართალდამცავი ორგანოებით დამთავრებული. ეს შეიძლება იყოს პირველი „შატდაუნი“ 2018 წლის დეკემბრის შემდეგ, რომელიც 2019 წლის დასაწყისამდე გაგრძელდა ტრამპის პირველი საპრეზიდენტო ვადის დროს.
მოქმედი კანონპროექტი ითვალისწინებს სამთავრობო უწყებების დაფინანსებას არსებულ დონეზე, ასევე გამოყოფს 100 მილიარდ აშშ დოლარს სტიქიური კატასტროფების შედეგების აღმოსაფხვრელად და 10 მილიარდ დოლარს სოფლის მეურნეობის დახმარებისთვის. ის ასევე მოიცავს ისეთ დებულებებს, როგორებიცაა დეპუტატების ხელფასების გაზრდა და სასტუმროში ცხოვრების ანგარიშებში შეტანილი ფარული გადასახადების წინააღმდეგ ზომები.
ორპარტიული შეთანხმება მთავრობის დაფინანსებას აგრძელებს 2025 წლის 14 მარტამდე.
Tesla-სა და SpaceX-ის დამფუძნებელმა ილონ მასკმა, რომელიც ტრამპმა წარადგინა მთავრობის ეფექტიანობის ახალი დეპარტამენტის ხელმძღვანელად, დაწერა, რომ „ეს კანონპროექტი არ უნდა გავიდეს“. თუ კონგრესი არ მიიღებს დოკუმენტს 21 დეკემბრის დილამდე, მაშინ სხვათა შორის მუშაობას შეაჩერებენ ისეთი ფედერალური უწყებები, როგორებიცაა პენტაგონი და NASA, რომლებიც თანამშრომლობენ მასკის კომპანიებთან.
დემოკრატები ამჟამად აკონტროლებენ სენატს, დემოკრატი პრეზიდენტი ჯო ბაიდენი კი ხელისუფლებაში რჩება ტრამპის ინაუგურაციამდე, რომელიც 20 იანვარს გაიმართება.
