პრეზიდენტი სალომე ზურაბიშვილი პლატფორმა X-ზე, რამდენიმე პოსტით ეხმაურება 14 დეკემბერს საქართველოში განვითარებულ მთავარ მოვლენებს - საქართველოს პრეზიდენტის არჩევნებსა და საღამოს დაგეგმილ ღონისძიებას, დედაქალაქის მთავარი ნაძვის ხის ანთებას, რომელიც პარლამენტის წინ, ზუსტად იმ ტერიტორიაზე იგეგმება, სადაც მეჩვიდმეტე დღეა პროევროპული აქციები იმართება.
სალომე ზურაბიშვილი პლატფორმა X-ზე იხსენებს ზუსტად ერთი წლის წინ, 14 დეკემბერს, ევროკავშირის მიერ მიღებულ გადაწყვეტილებას, რომლის თანახმადაც, საქართველოს ევროკავშირის წევრობის კანდიდატის სტატუსი მიენიჭა:
„ამ დღეს, გასულ წელს, საქართველომ ევროკავშირის კანდიდატის სტატუსი მიიღო. ეს იყო კონსენსუსის დღე, სახალხო სიხარულისა და დიდი ემოციების დღე! ერთი წლის განმავლობაში, ერთმა მმართველმა ადამიანმა/ერთმა პარტიამ, ხელიდან გაუშვა ეს არაჩვეულებრივი შესაძლებლობა და აშენებს რეპრესიულ ავტორიტარულ რეჟიმს“.
რაც შეეხება საპრეზიდენტო არჩევნებს, რომელიც 14 დეკემბერს იმართება და პრეზიდენტს ხალხის ნაცვლად, 300-წევრიანი კოლეგია ირჩევს, სალომე ზურაბიშვილი წერს:
„დღეს ცენტრალური კომიტეტი, „პარლამენტი“, „ირჩევს“ „ერთადერთსა და განუმეორებელ“ კანდიდატს, რაც დემოკრატიის დაცინვაა. ეს ვერასდროს შეუშლის ხელს საქართველოს გაჰყვეს თავის ევროპულ გზას და დემოკრატიულ მომავალს“.
300-წევრიან კოლეგიას ძირითადად „ქართული ოცნება“ წარმოადგენს და შესაბამისად - აქვს პრეზიდენტობის ერთადერთი კანდიდატის, მიხეილ ყაველაშვილის გაპრეზიდენტების შესაძლებლობაც.
დედაქალაქის მთავარი ნაძვის ხის ანთების ღონისძიებას პარლამენტის წინ, სალომე ზურაბიშვილი „უდიდეს პროვოკაციას“ უწოდებს და შიშობს, რომ ამ ღონისძიებამ შესაძლოა „კონფრონტაცია გამოიწვიოს“. ამის შესახებ პრეზიდენტი ორ პოსტს აქვეყნებს:
„პოლიცია იცავს და „აპატიმრებს“ საახალწლო ნაძვის ხეს, რაც არის სიმბოლო საპოლიციო სახელმწიფოსი, „ქართულ ოცნებას“ სურს ასეთ სახელმწიფოდ გადააქციოს საქართველო“.
„დაპატიმრებული ნაძვის ხე პარლამენტის წინ. მერი ეპატიჟება ბავშვებს, ხელისუფლება უხმობს მხარდამჭერებს 7 საათზე შეიკრიბონ ნაძვის ხის ანთების ღონისძიებაზე - სწორედ იმ ადგილას და იმ დროს, სადაც დემონსტრანტები ერთმანეთს ხვდებიან უკვე მეჩვიდმეტე დღეა. ეს არის უდიდესი პროვოკაცია მმართველი პარტიის მხრიდან, რომ გამოიწვიოს კონფრონტაცია“.
13 დეკემბერს პრეზიდენტმა თბილისის მერს, კახა კალაძეს მოუწოდა, ორბელიანის მოედანზე „მოაწყოს ის ღონისძიება, რასაც პარლამენტთან აპირებდა“.
ამ განცხადებას გამოეხმაურა კახა კალაძე და თქვა, რომ 14 დეკემბერს, 19:00 საათზე პარლამენტის შენობის წინ მისულ ხალხს „ბევრ სადღესასწაულო ღონისძიებასა“ და „სრულად უსაფრთხო გარემოს“ ჰპირდება.
14 დეკემბრის დილას, ყველასგან მოულოდნელად, საქართველოს პრეზიდენტი პარლამენტის შენობის მოპირდაპირე მხარეს იმ დროს გამოჩნდა, როცა პარლამენტის შენობაში არაპირდაპირი გზით პრეზიდენტის არჩევნები მიმდინარებდა.
პრეზიდენტმა მედიის წარმომადგენლებს უთხრა, რომ ის ქუჩაში კომენტარებს არ აკეთებს, ორბელიანების სასახლეში სამსახურში მიდის.
„ყველაფერი ვთქვი, ახლა მივდივარ სამსახურში. გამატარეთ“, - თქვა სალომე ზურაბიშვილმა, რომელიც ტრადიციულად, სამსახურში მისასვლელად არ სარგებლობს რუსთაველის გამზირის იმ მონაკვეთით, რომელზეც 14 დეკემბერს გამოჩნდა.
მეჩვიდმეტე დღეა, დემონსტრანტები დედაქალაქსა და რეგიონებში აპროტესტებენ „ქართულ ოცნებაში“ მიღებულ გადაწყვეტილებას, რომლის მიხედვითაც, საქართველო 2028 წლის ბოლომდე დღის წესრიგში არ დააყენებს ევროკავშირში გასაწევრიანებლად მოლაპარაკების გახსნის საკითხს.
28 ნოემბრის შემდეგ პოლიციამ აქციის 400-ზე მეტი მონაწილე დააკავა, მათ შორის სისხლის სამართლის წესით დააკავა 30-ზე მეტი ადამიანი, რომელთაც რამდენიმეწლიანი პატიმრობა ემუქრებათ. მათ რიცხვში არიან საზოგადოებისთვის ცნობილი სახეებიც.
დაკავებულთა შორის არ არიან პოლიციელები, მათ შორის ისინიც, ვინც ჟურნალისტებზე პირდაპირ ეთერში მუშაობის დროს იძალადეს.
