ნატოს წევრი ქვეყნები დათანხმდნენ, პრიორიტეტად მიიჩნიონ უკრაინის ინფრასტრუქტურის დაცვა, განაცხადა ალიანსის ხელმძღვანელმა მარკ რიუტემ 4 დეკემბერს - იმ ფონზე, როცა რუსეთი განაგრძობს უკრაინის ქალაქებზე იერიშებს დრონებითა და რაკეტებით.
ალიანსის 32 წევრი ქვეყნის საგარეო საქმეთა მინისტრების შეხვედრის მეორე დღეს, ჟურნალისტებთან საუბრისას რიუტემ თქვა, რომ შეხვედრაზე განიხილეს უკრაინისთვის საკმარისი საჰაერო თავდაცვის სისტემების მიწოდება, რათა მან ინფრასტრუქტურა დაიცვას რუსეთის დარტყმებისგან.
"გუშინ საღამოს, მკაფიო შეთანხმება შედგა, რომ უკრაინის დახმარება, განსაკუთრებით მის ინფრასტრუქტურასთან დაკავშირებით, მთავარი პრიორიტეტი უნდა იყოს", - თქვა რიუტემ.
"დარწმუნებული ვარ, რომ მოკავშირეები მომდევნო დღეებში და კვირებში შესაბამის ნაბიჯებს გადადგამენ იმის უზრუნველსაყოფად, რომ უკრაინას მიაწოდონ, რისი მიწოდებაც შეუძლიათ", - დასძინა ნატოს გენერალურმა მდივანმა.
რუსეთი უკვე მესამე ზამთარია მიზანში იღებს უკრაინის ენერგეტიკის ინფრასტრუქტურას, რაც იწვევს მსხვერპლს და წყვეტას ათასობით მოქალაქის ელექტროენერგიით მომარაგებაში.
4 დეკემბრის დილას, რუსეთის დრონებმა დარტყმები განახორციელეს ჩრდილოეთის ჩერნიგოვის რეგიონზე, რის შედეგადაც დაზიანდა ერთ-ერთ სოფელში მდებარე სახლები, წერს რეგიონის გუბერნატორი ვიაჩესლავ ჩაუსი ტელეგრამში.
