რუსეთის მიერ ანექსირებული დონეცკის უზენაესმა სასამართლომ უკრაინაში, უკრაინის შეიარაღებული ძალების მხარეზე მებრძოლი „ქართული ლეგიონის“ ლიდერს, მამუკა მამულაშვილს, 23 წლით თავისუფლების აღკვეთა მიუსაჯა.
რუსეთის გენერალური პროკურატურის ინფორმაციით, 46 წლის მამულაშვილი სისხლის სამართლის კოდექსის რამდენიმე მუხლით გაასამართლეს.
„სასამართლოში დადგინდა, რომ 2014 წლის აპრილიდან 2024 წლის მაისამდე პერიოდში მამულაშვილი დაქირავებულ მებრძოლებს აგროვებდა უცხო ქვეყნებში, რომლებიც არ არიან კონფლიქტის მონაწილეები, პრიორიტეტულად - საქართველოს შეიარაღებული ძალების ყოფილ სამხედრო მოსამსახურეთა შორის. შემდეგ ის აყვანილ მოქალაქეებს წვრთნიდა და აიარაღებდა, ასევე უზრუნველყოფდა საბრძოლო მოქმედებებში მათ მონაწილეობას,“ ნათქვამია, სხვათა შორის, პროკურატურის განცხადებაში.
დაუსწრებლად გამოუტანეს განაჩენი კიდევ სამ ქართველ მებრძოლს - 34 წლის გიორგი რუსიტაშვილს, 30 წლის ნოდარ პეტრიაშვილსა და 54 წლის ვანო ნადირაძეს. მათ 14-14 წლით თავისუფლების აღკვეთა მიესაჯათ „შეიარაღებულ კონფლიქტში დაქირავებული მებრძოლის მონაწილეობის“ შესახებ მუხლით. განაჩენის მიხედვით, მსჯავრდადებულები მკაცრი რეჟიმის კოლონიაში მოიხდიან სასჯელს.
„ქართული ლეგიონი“ არის მოხალისეთა შეიარაღებული ფორმირება, რომელიც უკრაინის არმიის მხარეზე იბრძვის. ის ძირითადად შედგება ქართველი სამხედროებისგან, რომლებსაც შეიარაღებულ კონფლიქტებში მონაწილეობის გამოცდილება აქვთ. რუსეთში „ქართული ლეგიონი“ ტერორისტულ ორგანიზაციად არის აღიარებული.
