ნატოს საპარლამენტო ასამბლეამ 25 ნოემბერს მონრეალის სხდომაზე მიღებულ რეზოლუციაში ნატოს მთავრობებს მოუწოდა, არ შეასუსტონ უკრაინის მხარდაჭერა და, კერძოდ, „გაზარდონ პოლიტიკური და პრაქტიკული ძალისხმევა, რათა დაეხმარონ უკრაინას, მიიღოს მოწვევა და რაც შეიძლება მალე გახდეს ნატოს 33-ე წევრი“.
რეზოლუცია ასევე გამოხატავს მხარდაჭერას უკრაინის პრეზიდენტ ვოლოდიმირ ზელენსკის მიერ ადრე წარდგენილი ე.წ. გამარჯვების გეგმისადმი. ამ გეგმის ერთ-ერთი პუნქტი ითვალისწინებს ნატოში უკრაინის ოფიციალურ მიწვევას.
წყაროების თანახმად, მის არასაჯარო დანართში ასევე საუბარია უკრაინის მოთხოვნაზე ამერიკული ფრთოსანი რაკეტების, Tomahawk-ების მიწოდებაზე, რომელთა მოქმედების რადიუსი 1600 კმ-მდე ან 2500 კმ-მდეა (დამოკიდებულია ტიპზე). თავად ნატოს საპარლამენტო ასამბლეის რეზოლუციაში არ არის ნახსენები Tomahawk-ის რაკეტები, მაგრამ ის გამოხატავს მხარდაჭერას უკრაინისთვის საჰაერო თავდაცვის სისტემების, შორსმსროლელი მაღალი სიზუსტის სარაკეტო სისტემებისა და ავიაგამანადგურებლების მიწოდებაში. დოკუმენტი ასევე მხარს უჭერს თავდაცვის მიზნით რუსეთის ტერიტორიაზე სამხედრო ობიექტებზე დარტყმებს დასავლური იარაღის გამოყენებით.
ნატოს შემდეგი სამიტისთვის, ნათქვამია დოკუმენტში, ალიანსმა უნდა მოამზადოს რუსეთთან დაკავშირებით საერთო სტრატეგიული დოქტრინის პროექტი, რომელიც ფოკუსირებული უნდა იყოს მოსკოვისთვის სამხედრო წინააღმდეგობის გაწევის უნარზე და სანქციების რეჟიმის გაფართოებაზე რუსეთის მიერ აგრესიული ომების წარმოების უნარის დასასუსტებლად.
დოკუმენტი არის საკონსულტაციო და არა სავალდებულო ხასიათისა. იგი მიღებულ იქნა უკრაინის ომთან დაკავშირებით ვითარების ახალი ესკალაციის ფონზე, მას შემდეგ, რაც შეერთებულმა შტატებმა და მისმა მოკავშირეებმა უკრაინას ნება დართეს, მათი იარაღით მიიტანონ იერიში რუსეთის ტერიტორიაზე, ხოლო რუსეთის ჯარებმა, როგორც ამტკიცებენ, საშუალო სიშორის რაკეტა „ორეშნიკით“ დაარტყეს უკრაინის ქარხანა „იუჟმაშს“ ქალაქ დნეპრში.
კრემლის პრესმდივანმა დმიტრი პესკოვმა სამშაბათს განაცხადა, რომ დასავლეთში უნდა „მოესმინათ“ რუსეთის პრეზიდენტ ვლადიმირ პუტინისთვის, რომელმაც, სხვა საკითხებთან ერთად, თქვა, რომ „ორეშნიკი“, რომელსაც ბირთვული ქობინის ტარებაც შეუძლია, ასევე შეიძლება გამოყენებულ იქნეს ნატოს ქვეყნებზე დარტყმებისთვის, რომლებიც იარაღით ამარაგებენ უკრაინას.
26 ნოემბერს ბრიუსელში იმართება ნატო-უკრაინის საბჭოს სხდომა, რომელიც, სხვა საკითხებთან ერთად, ეძღვნება საშუალო სიშორის რაკეტით რუსეთის მიერ განხორციელებული დარტყმის განხილვას. ნატოს წევრებმა ადრე დაგმეს ეს ფაქტი და მას ესკალაცია უწოდეს.
