ოკუპირებული აფხაზეთის ყოფილი დე ფაქტო პრეზიდენტი, ასლან ბჟანია ამბობს, რომ მოსკოვში იმყოფება.
„ამჟამად მე აფხაზეთში არა ვარ, მოსკოვში ვარ რამდენიმე დღით“, - განუცხადა მან რუსეთის მთავრობის პროპაგანდისტულ მედიას, ТАСС-ს.
ასლან ბჟანიას გადადგომა ოპოზიციის პროტესტსა და მათ მიერ „სამთავრობო კომპლექსის“ დაკავებას მოჰყვა.
15 ნოემბერს რუსეთ-აფხაზეთის საინვესტიციო ხელშეკრულების წინააღმდეგ გამოსულმა დემონსტრანტებმა „სამთავრობო შენობების“ კომპლექსის გარშემო აღმართული ღობე მოანგრიეს და „პარლამენტისა“ და „პრეზიდენტის ადმინისტრაციის“ შენობები დაიკავეს.
პროტესტის ფონზე „პარლამენტმა“ გააუქმა სხდომა, რომელზეც მოსკოვთან საინვესტიციო ხელშეკრულების რატიფიცირების კენჭისყრა უნდა გამართულიყო.
დე ფაქტო პრეზიდენტის ადმინისტრაციამ ხელშეკრულების გაწვევის გადაწყვეტილება მიიღო, თვითონ ბჟანიამ კი თავი მშობლიურ სოფელ ტამიშში შეაფარა.
დე ფაქტო პარლამენტის წევრებმა პრეზიდენტის გადადგომის შესახებ ცნობა 19 ნოემბერს მიიღეს. მას შემდეგ, ბჟანია დროებით ჩაანაცვლა დე ფაქტო ვიცე-პრეზიდენტმა, ბადრა გუნბამ.
