ამერიკელმა ინვესტორმა სტივენ ლინჩმა, რომელიც დაახლოებით 20 წელი ეწეოდა ბიზნესს რუსეთში, აშშ-ის ფინანსთა სამინისტროს მიმართა თხოვნით, მონაწილეობა მიიღოს აუქციონში, თუკი მასზე გასაყიდად გაიტანენ გაზსადენ "ჩრდილოეთის ნაკად 2-ს".
"უოლ სტრიტ ჯოურნალის" თანახმად, ლინჩმა ფინანსთა სამინისტროს ასეთი თხოვნით 2024 წლის თებერვალში მიმართა. შესაბამისი ნებართვა მას საშუალებას მისცემს, გაზსადენის შეძენის თაობაზე აწარმოოს მოლაპარაკებები იმ პირებთან, რომლებიც აშშ-ის მიერ არიან სანქცირებული.
აშშ-ის ფინანსთა სამინისტროსადმი გაგზავნილი წერილში ლინჩი აღნიშნავს, რომ გაზსადენი "ჩრდილოეთის ნაკადი 2-ის" ოპერატორ Nord Stream 2 AG-ის გაკოტრების პროცედურით, ვალების რესტრუქტურიზაციის ან ლიკვიდაციისთვის დადგენილია მკაცრი ვადები, 2025 წლის იანვრამდე.
ლინჩი ასევე მიიჩნევს, რომ Nord Stream 2-ის შეძენა შეერთებული შტატების ინტერესებს აკმაყოფილებს და შეიძლება გახდეს უკრაინაში კონფლიქტის მოგვარებაში გავლენის ბერკეტი.
ლინჩი ამტკიცებს, რომ ომის დასრულების შემდეგ როგორც რუსეთს, ისე მისი ბუნებრივი აირის ყოფილ მყიდველებს ევროპაში, გაუჩნდებათ ცდუნება, "ჩართონ მილსადენი, მიუხედავად იმისა, თუ ვინ ფლობს მას." WSJ-ის წყაროების თანახმად, ლინჩი თვლის, რომ მას ძალიან იაფად შეუძლია შეიძინოს Nord Stream 2-ის ოპერატორი, რომელიც დაახლოებით 11 მილიარდ დოლარად არის შეფასებული. ბევრი ინვესტორი, მისი აზრით, არ მიიღებს მონაწილეობას ტენდერში გეოპოლიტიკის გამო, ხოლო სხვა განმცხადებლები ვერ დააკმაყოფილებენ შეერთებული შტატების ინტერესებს.
სტივენ ლინჩი არის საერთაშორისო საინვესტიციო კომპანია Monte Valle Partners-ის პარტნიორი და დამფუძნებელი. იგი დაკავებულია პრობლემური აქტივებით.
გაზსადენების, „ჩრდილოეთის ნაკადი 1-ისა" და „ჩრდილოეთის ნაკადი 2-ის" ოთხიდან სამი ხაზი 2022 წლის სექტემბრის ბოლოს დაზიანდა ძლიერი აფეთქებების შედეგად. გამოძიებაში მონაწილე კომპანია Blueye Robotics-ის თანახმად, 80 მეტრის სიღრმეში მილსადენის მრავალმეტრიან მონაკვეთზე მილები ან არ არის, ან მათი ნამსხვრევები ფსკერზეა მიმოფანტული.
დასავლეთის ოფიციალური პირები აფეთქებებში თავიდან რუსეთს ადანაშაულებდნენ, თავის მხრივ, მოსკოვი დასავლეთს სდებდა ბრალს.
მოგვიანებით, აგვისტოს დასაწყისში, გერმანული მედია იტყობინებოდა, რომ გერმანიის პროკურატურამ რუსეთის გაზსადენზე დივერსიაში მთავარ ეჭვმიტანილად ცნო უკრაინელი ინსტრუქტორი ყვინთვაში და მისი დაკავების ორდერი გასცა პოლონეთში.
