ზუგდიდის შოთა მესხიას სახელობის სასწავლო უნივერსიტეტში სტუდენტების პროტესტი გრძელდება. აქციის მონაწილეები, რომლებიც ხელახალი საპარლამენტო არჩევნების გამართვას ითხოვენ, დაშლას არ აპირებენ. მათ გასული ღამეც უნივერსიტეტის ფოიეში გაატარეს. აქციის მონაწილეებს გამოფენილი აქვთ საქართველოს და ევროკავშირის დროშები, ასევე პლაკატები წარწერით: „გაყალბდა“, „მოგვპარეს“, „ზუგდიდი ირჩევს ევროპას“, „დუმილი სირცხვილია“, „არჩევნებმა გაჟონა“.
პროტესტის პარალელურად უნივერსიტეტში გრძელდება სასწავლო პროცესი.
აქციის მონაწილეებმა რადიო თავისუფლებას უთხრეს, რომ უნივერსიტეტის ფოიეში არ არის გათბობა, თუმცა სოციალურ ქსელში მათი პროტესტის შესახებ ინფორმაციის გავრცელების შემდეგ, სამოქალაქო აქტივისტებმა და მოქალაქეებმა სტუდენტებს სხვადასხვა საჭირო ნივთი მიუტანეს, მათ შორის ელექტროგამათბობელი, პლედები და სურსათი. სტუდენტების თქმით, სიცივის მიუხედავად, ფოიეში უწყვეტი პროტესტი დღე და ღამე იქნება.
„შოთა მესხიას სახელობის უნივერსიტეტის სტუდენტები შევუერთდით სხვა სტუდენტების პროტესტს ტოტალურად გაყალბებული არჩევნების წინააღმდეგ, მოპარული ხმების გამო...მხარდაჭერა მაღალია და მუხტიც...ჩვენ ვაპირებთ აქ დარჩენას და პროტესტის გაგრძელებას, სანამ ამის საჭიროება იქნება“, - უთხრა რადიო თავისუფლებას უნივერსიტეტის მესამე კურსის სტუდენტმა ანა ჭანიამ.
სამოქალაქო აქტივისტი როსტომ ზარანდია დანარჩენ სტუდენტებსაც მოუწოდებს პროტესტში ჩართვისკენ, რადგან, მისი თქმით, ახლა ქვეყნის ბედი წყდება. იგი აქციას წუხელვე შეუერთდა პლაკატით, რომელზეც მეგრული წარწერაა: „გიჯინ-მიჯინ ბორო ვარდა“ (გაიხედ-გამოიხედე, სულელი ნუ იქნები).
აქტივისტის თქმით, ამ პლაკატით ცდილობს იმ ახალგაზრდების ყურადღების მიპყრობას, რომლებიც ჯერ კიდევ არ ჩართულან ქვეყნის მასშტაბით მიმდინარე პროტესტში: „მინდა, რომ სტუდენტებმა მკითხონ, რატომ არის ეს ტექსტი? ვინმე ხომ არ ასულელებთ?... მე ვფიქრობ, რომ გაიგებენ სათქმელს... მთავარი გამოცდა გველის რუსთაველზე, მთავარი გამოცდა არის წინ. ახლა აუცილებელია მხოლოდ მოძრაობა და მოძრაობა... ჩვენ უნდა დავიბრუნოთ ჩვენი თავისუფლება, წართმეული არჩევანის უფლება. არჩევნები ბევრჯერ გაყალბებულა, უბრალოდ ახლა არჩევნების ფუნქცია ქრება. თუ ახლა დავთმეთ, ეს ნიშნავს, რომ არჩევნები აღარ გვჭირდება“, - ამბობს აქტივისტი როსტომ ზარანდია.
აქციის მონაწილეები მიიჩნევენ, რომ დროთა განმავლობაში საპროტესტო მუხტი გაიზრდება. საჭიროების შემთხვევაში, ისინი მზად არიან დედაქალაქში გაემგზავრონ და პროტესტს იქ შეუერთდნენ.
19 ნოემბრის დილით, საპოლიციო ძალებმა საპროტესტო აქციის მონაწილეებისგან გაათავისუფლეს თბილისის სახელმწიფო უნივერსიტეტის პირველი კორპუსის მიმდებარე ტერიტორია, რომელიც 17 ნოემბრიდან იყო გადაკეტილი.
აქციის მონაწილეებს, რომლებიც 26 ოქტომბრის საპარლამენტო არჩევნებს გაყალბებულად მიიჩნევენ და ხელახალ არჩევნებს მოითხოვენ, ამ ტერიტორიაზე კარვები ჰქონდათ გაშლილი.
საპოლიციო ძალები ჭავჭავაძის გამზირზე 19 ნოემბერს, დაახლოებით დილის შვიდი საათისთვის მივიდნენ. პარალელურად შსს-მ განაცხადა, რომ „შეკრებებისა და მანიფესტაციების შესახებ“ კანონით დაუშვებელია ტრანსპორტის სავალი ნაწილის ხელოვნურად გადაკეტვა, თუ ამას არ მოითხოვს შეკრების მონაწილეთა რაოდენობა.
შინაგან საქმეთა სამინისტროში რადიო თავისუფლებას უთხრეს, რომ 19 ნოემბერს თბილისის სახელმწიფო უნივერსიტეტის მიმდებარე ტერიტორიის დემონსტრანტებისგან გათავისუფლებისას 16 პირი დააკავეს.
მათგან სამი - ორი დემონსტრანტი და „მთავარი არხის“ ოპერატორი - ხელწერილების საფუძველზე გაათავისუფლეს.
