საქართველოს ცენტრალური ხელისუფლების მიერ კონტროლირებადი სოფლის, ჩორჩანის სიახლოვეს, ოკუპირებულ წნელისში ჩავიდა სამხრეთ ოსეთის დე ფაქტო პრეზიდენტი. ალან გაგლოევი იქ მყოფ ე.წ. მესაზღვრეებს შეხვდა. დე ფაქტო რესპუბლიკის პრეზიდენტის პრესსამსახურის ცნობით, გაგლოევს თან ახლდნენ დე ფაქტო სახელმწიფო უშიშროების კომიტეტის თავმჯდომარე ოლეგ შირანი და კგბ-ს ე.წ. სასაზღვრო დაცვის სამსახურის უფროსის მოვალეობის შემსრულებელი ვალერიან ალიხანტი. ვალერიან ალიხანტიმ დე ფაქტო პრეზიდენტს ე.წ საზღვრის ამ მონაკვეთზე ოპერატიული ვითარება მოახსენა. მისი თქმით, მესაზღვრეებმა სახელმწიფო საზღვრის ხაზზე საინფორმაციო ნიშნები და ბანერები დაამონტაჟეს.
„სასაზღვრო საგუშაგოს პირადი შემადგენლობით ჩვენ მთლიანად ვაკონტროლებთ ტერიტორიას. გარდა ამისა, ჩვენ გვაქვს პირდაპირი კავშირი რუსეთის „ეფ-ეს-ბე"-ს მესაზღვრეებთან“, - განაცხადა მან. გაგლოევმა ე.წ. მესაზღვრეებს სასაზღვრო სამსახურის დაარსების დღე მიულოცა და მადლობა გადაუხადა კეთილსინდისიერი მუშაობისთვის, მოვალეობისადმი ერთგულებისა და ფიცისთვის.
„სამხრეთ ოსეთის რესპუბლიკის კგბ-ს სასაზღვრო სამსახური მნიშვნელოვან როლს ასრულებს რესპუბლიკის ეროვნული უსაფრთხოებისა და ჩვენი მოქალაქეების სიმშვიდის უზრუნველყოფაში. ადგილზე სიტუაციის გაცნობის შემდეგ შემიძლია დამაკმაყოფილებლად შევაფასო მათი საქმიანობა და პირობები. რა თქმა უნდა, არის საკითხები, რომლებსაც ეტაპობრივად განვიხილავთ. ეს რთული, მაგრამ კეთილშობილი საქმეა - სამშობლოს დაცვა. დარწმუნებული ვარ, რომ სასაზღვრო სამსახურის თანამშრომლები გააგრძელებენ ძალისხმევას სახელმწიფო საზღვარზე სტაბილურობისა და წესრიგის უზრუნველსაყოფად“, - განაცხადა გაგლოევმა.
რადიო თავისუფლების ცხინვალელი წყაროს ცნობით, ეს ნაბიჯი გაგლოევმა ოპოზიციის საპასუხოდ გადადგა. ცხინვალელი სამოქალაქო აქტივისტის თქმით, რამდენიმე დღის წინ სოციალურ ქსელში, ყოფილი პრეზიდენტის, ანატოლი ბიბილოვის მომხრეების პოსტი გამოჩნდა, რომელშიც ისინი აცხადებდნენ, რომ გაგლოევმა წნელისთან საგუშაგოები გააუქმა და ანტისახელმწიფოებრივად მოქმედებს.
„სოციალურ ქსელში ბიბილოვის მომხრეებს შექმნილი აქვთ გვერდი, რომელსაც „მართალი რეალობა“ ჰქვია. ამ გვერდზე გამოაქვეყნეს პოსტი. წერენ, რომ გაგლოევმა გააუქმა საპოლიციო პოსტი წნელისში და იქ მყოფი ჩვენი მოქალაქეები საფრთხეში ჩააგდო. ჩემი აზრით, გაგლოევი ამის საპასუხოდ ჩავიდა იქ, შეხვდა მესაზღვრეებს და ყველას მიანიშნა, რომ სამხრეთ ოსეთის ტერიტორია სათანადოდ დაცულია. ეს იყო მისი ვიზიტის მიზანი", - გვითხრა ცხინვალელმა წყარომ.
2019 წლის ზაფხულში საქართველოს ხელისუფლებამ სოფელ ჩორჩანაში საპოლიციო საგუშაგო განათავსა და იქ განსაკუთრებულ დავალებათა სპეცრაზმი შეიყვანა. ამის პასუხად, 2019 წლის 29 აგვისტოს, დე ფაქტო ხელისუფლებამ ერგნეთის „ინციდენტების პრევენციისა და მათზე რეაგირების“ სამუშაო ჯგუფის შეხვედრა ჩაშალა და ჩორჩანიდან ქართული საგუშაგოს გატანა მოითხოვა, წინააღმდეგ შემთხვევაში კი განსაკუთრებული ზომების გატარებით დაიმუქრა. 30 აგვისტოს ბიბილოვის ხელისუფლებამ წნელისში შეიარაღებული ძალები გადაისროლა. ვითარება დაიძაბა. მას შემდეგ რამდენიმე ტექნიკური შეხვედრაც ჩატარდა, მაგრამ უშედეგოდ. ბიბილოვმა წნელისის კრიზისის მოგვარებამდე ახალგორი ჩაკეტა და, ფაქტობრივად, იქაური მოსახლეობა მძევლად აიყვანა. ჩორჩანის საპოლიციო საგუშაგოს გაუქმებას დე ფაქტო ხელისუფლება დღემდე ითხოვს. ოკუპირებულ წნელისში კი საპასუხოდ ორი საგუშაგო აქვს განთავსებული და იქიდან აკონტროლებს მთელ პერიმეტრს.
