რუსეთში გამოცხადებული მობილიზაციის გამო, ქვეყანაში დაძაბული ვითარება გრძელდება, – ამის შესახებ ინფორმაციას ომის კვლევის ინსტიტუტი (ISW) ავრცელებს.
ანალიტიკოსების ცნობით, კურსკის ოლქის მობილიზებული პერსონალის ცოლებმა ხელისუფლებას ქმრების დაბრუნების მოთხოვნით მიმართეს.
რუსული მედიის ინფორმაციით, რუსმა სამხედრო ჩინოვნიკებმა პერსონალის ნაწილი სახლში გაგზავნეს, ხოლო დარჩენილი მობილიზებული პერსონალის ცოლები მოსკოვში გამგზავრებასა და რუსეთის თავდაცვის სამინისტროსთან აუდიენციის მოთხოვნას აპირებენ.
გარდა ამისა, ლუგანსკის ოლქში, ბრძოლაზე უარის თქმის გამო დაკავებული მობილიზებული პირების ნათესავები უკრაინის დასახლებაში ჩავიდნენ და რუს სამხედროებს მათი ნახვის თხოვნით მიმართეს.
ასევე, რუსულ მედიაზე დაყრდნობით, ანალიტიკოსები წერენ, რომ ბელგოროდის ოლქის მობილიზებული პერსონალის ნათესავებმა სოციალურ ქსელში დაწერეს, რომ მობილიზაციისთვის გადახდილი თანხა გაცილებით ნაკლები იყო, ვიდრე ამას რუსეთის ოფიციალური პირები მათ დაჰპირდნენ.
