საქართველოს საფეხბურთო ნაკრების მთავარი მწვრთნელი ვილი სანიოლი, უეფას ერთა ლიგის მეოთხე ტურის მატჩამდე ერთი დღით ადრე, „დინამო არენის“ საპრესკონფერენციო დარბაზში ჟურნალისტებს შეხვდა. ფრანგმა სპეციალისტმა თანადგომა გამოუცხადა ბულგარელ ნახევარმცველ ტოდორ ნედელევს, რომელიც თბილისში მომხდარი ავტოსაგზაო შემთხვევის შემდეგ საავადმყოფოში გადაიყვანეს.
„მინდა ნედელევს სწრაფი გამოჯანმრთელება ვუსურვო. ცუდი ამბავი მოხდა. ეს ჩვენთვის უდიდესი შოკი იყო. მსგავსი რამ ნებისმიერ ჩვენგანს შეიძლება შეემთხვეს. რაც შეეხება ხვალინდელ მატჩს, წარმატებულმა სერიამ ეიფორიაში არ უნდა ჩაგვაგდოს. ჩემი გუნდი პროფესიონალებითაა დაკომპლექტებული და მჯერა, კონცენტრაციის დაკარგვას არ დავუშვებთ. საქართველოს ნაკრებში დიდი კონკურენცია და ამასთან, სამაგალითო ერთსულოვნებაა. თამაშს არც ჩაკვეტაძე იგებს, არც კვარაცხელია და არც სხვა რომელიმე ფეხბურთელი. თამაშს მთლიანად გუნდი იგებს, რომლის თითოეული წევრიც ჩემთვის თანაბრად მნიშვნელოვანია“, - განაცხადა ვილი სანიოლმა.
საქართველოს ნაკრები, ერთა ლიგის C დივიზიონში, სამი ტურის შემდეგ, ჯგუფის ლიდერია, ქულათა მაქსიმუმით - ცხრა ქულით. მეორე ადგილზე მყოფ ჩრდილოეთ მაკედონიას ხუთი ქულით უსწრებს, ბულგარეთს - შვიდით, ხოლო გიბრალტარს - რვით.
12 ივნისის მატჩის მოგების შემთხვევაში ქართველი ფეხბურთელები ერთი ნაბიჯით მიუახლოვდებიან B დივიზიონს და ევროპის 2024 წლის ჩემპიონატის შესარჩევი ციკლის პლეი ოფს.
საქართველოსა და ბულგარეთის შეხვედრა „დინამო არენაზე“ 20:00 საათზე დაიწყება.
