განცხადებაში, რომელიც საქართველოს მესამე პრეზიდენტის მიხეილ სააკაშვილის შესახებ გაავრცელა სპეციალურმა პენიტენციურმა სამსახურმა ვკითხულობთ, რომ მას არ გადასცეს დეკანოზ მიქაელ ბოტკოველის მიერ მიტანილი სახარება. განცხადებაში ამის მიზეზიც არის დასახელებული:
„დეკანოზის მიერ მოტანილ სახარებას ჰქონდა მოოქროვილი ელემენტები და თვლები, №12 პენიტენციური დაწესებულების დებულების თანახმად, ბრალდებულს/მსჯავრდებულს ეკრძალება ფასეული ნივთებისა პენიტენციურ დაწესებულებაში ქონა. სწორედ ფასიან ნივთების ნუსხაშია ყველა სახის ნივთი ან სამკაული, რომელსაც აქვს ძვირფასი გაფორმება".
საქართველოს კათალიკოს პატრიარქის ილია მეორის დავალებით, რუსთავის #12 დაწესებულებაში მიხეილ სააკაშვილს შეხვდა პატრიარქის მდივანი, დეკანოზი მიქაელ ბოტკოველი. საპატრიარქოს ინფორმაციით, რუსთავის ციხეში მყოფი მიხეილ სააკაშვილი ილია მეორის კურთხევით მოინახულეს და მისი დალოცვა გადასცეს.
საქართველოს მესამე პრეზიდენტი მიხეილ სააკაშვილი 1 ოქტომბერს, თბილისში დააკავეს და რუსთავის სასჯელაღსრულების დაწესებულებაში გადაიყვანეს. 1 ოქტომბერს დილიდან, „ქართული ოცნების“ ლიდერები და შსს აცხადებდნენ, რომ მიხეილ სააკაშვილს არ დაუტოვებია უკრაინის ტერიტორია და საქართველოს საზღვარი არ გადმოუკვეთავს, საღამოს კი, პრემიერ-მინისტრმა ღარიბაშვილმა საგანგებო ბრიფინგზე გამოაცხადა, რომ სააკაშვილი დაკავებულია. ოფიციალურად ამ დრომდე უცნობია, რა გზით დაბრუნდა მიხეილ სააკაშვილი ქვეყანაში.
