ფიბამ, 2020 წლის შედეგების მიხედვით, ევროპის საკალათბურთო ნაკრებების რეიტინგი გამოაქვეყნა და მასში საქართველოს ნაკრები მეექვსე ადგილს იკავებს. მსოფლიო კალათბურთის მმართველი ორგანოს ოფიციალური ვებსაიტის მიერ გავრცელებულ ცხრილში ილიას ზუროსის გაწვრთნილი გუნდი მხოლოდ იტალიას, საფრანგეთს, ისრაელს, ხორვატიასა და საბერძნეთს ჩამორჩება და უსწრებს ისეთ ძლიერ ნაკრებებს, როგორებიცაა სლოვენია, ესპანეთი, სერბეთი, ლიტვა, თურქეთი და გერმანია.
საქართველოს ნაკრები წინა რეიტინგში მეთორმეტე ადგილზე იყო. ერთბაშად ექვსსაფეხურიანი აღმასვლის მთავარი მიზეზი კი ევროპის 2022 წლის ჩემპიონატის შესარჩევ ციკლში წარმატებული თამაშია - ოთხი მოგება ოთხი ტურის შემდეგ და ლიდერის პოზიცია ჯგუფში, სადაც საქართველოს მეტოქეები სერბეთი, ფინეთი და შვეიცარია არიან.
ქართველი კალათბურთელები ჯგუფური ეტაპის ბოლო ორ მატჩს თბილისში გამართავენ. 19 თებერვალს სერბეთის, ხოლო 21 თებერვალს ფინეთის წინააღმდეგ.
