ჩეხეთში პროკურატურამ 16 წლით თავისუფლების აღკვეთა მოითხოვა ქვეყნის მოქალაქისთვის, რომელიც რამდენიმე თვე მონაწილეობდა დონბასში მიმდინარე ბრძოლებში, რუსეთის მხარდაჭერით მოქმედი სეპარატისტების მხარეს.
როგორც გამოცემა Novinky იტყობინება, კარლოვი ვარის მხარის მცხოვრები, 26 წლის ლუკაშ ნ., გამოძიების თანახმად, 2015 წელს შეუერთდა ე.წ. „დონეცკის სახალხო რესპუბლიკის“ სეპარატისტებს. როგორც აცხადებენ, ის იყო სეპარატისტების შეიარაღებული რაზმების წევრი, იყო მზვერავი, მონაწილეობდა უკრაინის სამთავრობო ჯარებთან შეტაკებებში. დონბასი მან 2016 წელს დატოვა. მას ბრალად ედება ტერორისტული საქმიანობა, რის საფუძველზეც 12-დან 20 წლამდე პატიმრობა ემუქრება.
საკუთარი სიტყვებით, ის დონბასში გაემგზავრა უკრაინელი „ფაშისტების“ წინააღმდეგ საბრძოლველად.
ჩეხეთში დაბრუნების შემდეგ ბრალდებულს ფსიქიკური პრობლემები ჰქონდა. მას დაუსვეს პოსტტრავმატული სტრესული აშლილობის დიაგნოზი.
მანამდე ჩეხეთში რამდენიმე ადამიანს მიუსაჯეს პატიმრობა, მათ შორის ბელარუსის მოქალაქეს, რომელიც უკრაინელი სეპარატისტების მხარეზე იბრძოდა.
