აშშ-ის არჩეული პრეზიდენტი, ჯო ბაიდენი 15 დეკემბერს ჩაერთო ჯორჯიის შტატში მიმდინარე საარჩევნო კამპანიაში სენატისთვის და ამომრჩეველს მოუწოდა, ორ მეორე ტურში მხარი დემოკრატებს დაუჭირონ.
რაფაელ ვორნოკის და ჯონ ოსოფის მხარდასაჭერ კამპანიაში ბაიდენი ჩაერთო სენატის უმრავლესობის ლიდერთან, რესპუბლიკელ მიჩ მაკკონელთან გამართული შეხვედრის შემდეგ, სადაც ისინი თანამშრომლობაზე შეთანხმდნენ. ბაიდენმა ჟურნალისტებს უთხრა, რომ ის და მაკკონელი მალე ისევ შეხვდებიან ერთმანეთს, თანამშრომლობის პოტენციურ სფეროებზე სასაუბროდ.
მაკკონელმა - რომელიც არჩევნების შედეგებზე კვირების განმავლობაში სიჩუმეს ინარჩუნებდა, როცა პრეზიდენტი დონალდ ტრამპი უსაფუძვლო ბრალდებებს ავრცელებდა გაყალბების შესახებ - ბაიდენს 15 დეკემბერს მიულოცა გამარჯვება 3 ნოემბრის საპრეზიდენტო არჩევნებში. საარჩევნო კოლეგიამ თავისი სათქმელი თქვა, "და, ამდენად, დღეს მსურს მივულოცო არჩეულ პრეზიდენტს, ჯო ბაიდენს", - განაცხადა მაკკონელმა. მან გამარჯვება მომავალ ვიცე-პრეზიდენტს, კამალა ჰარისსაც მიულოცა.
თუ ორივე მეორე ტურში დემოკრატები გაიმარჯვებენ, ეს მათ სენატში მოუტანს ხმების პროპორციას 50-50-ზე - რაც ნიშნავს, რომ ჰარისი, რომელიც სენატის პრეზიდენტად ითვლება, შეძლებს გადაწონოს თანაბარი შედეგით დასრულებული ყველა კენჭისყრა, რაც დემოკრატიულ პარტიას მაკკონელის გადაყენების საშუალებას მისცემს.
