სამწუხაროდ, ელჩები, შუამავლები კი არა მმართველი გუნდის მხარეს უფრო წარმოადგენენ , – ამის შესახებ პოლიტიკური მოძრაობა “ტრიბუნას” ლიდერი დავით ჭიჭინაძე სოციალურ ქსელში წერს, რითაც ოპოზიციასა და მმართველ გუნდს შორის მიმდინარე მოლაპარაკებებს ეხმაურება.
დავით ჭიჭინაძის განცხადებით, ოპოზიციისა და მმართველი გუნდის ელჩებთან შეხვედრას ოპოზიციის სრული შემადგენლობა და მედია უნდა ესწრებოდეს.
„ვინც დღეს ფულზე გაიყიდება, ვინც „ოცნების“ ქმედებაში, შესაბამისად ხალხის მოტყუებაში პოზიტივს ხედავს და „ოცნების“ მხარდაჭერას ცდილობს, იმ ადამიანების ადგილი პოლიტიკაში არ არის! აბა, მორალურად და იდეოლოგიურად ივანიშვილის მიტაცებულ პარლამენტში შესვლა, რატომ უნდა მოგინდეს?!
ამიტომ ვამბობდი ყოველთვის, რომ ელჩებთან შეხვედრას უნდა ესწრებოდეს ოპოზიცია სრული შემადგენლობით და მედია, ხალხის ზურგს უკან და დახურულ კარს მიღმა რომ არ მოხდეს მოლაპარაკება და გარიგება.
ე.წ. გადალახულებზე და გადაულახავებზე საუბარიც არასწორია, რადგან ესეც ირიბი აღიარებაა იმ მონაცემების, რასაც „ოცნება“ აცხადებს. მით უმეტეს მაშინ, როდესაც ელჩები, სამწუხაროდ, შუამავლები კი არა მმართველი გუნდის მხარეს უფრო წარმოადგენენ“, – წერს ჭიჭინაძე.
