თავისუფალი სტილით მოჭიდავეებმა მირზა სხულუხიამ და ტარიელ გაფრინდაშვილმა ბუდაპეშტში მიმდინარე 23-წლამდელთა მსოფლიოს ჩემპიონატზე ოქროს მედლები მოიპოვეს.
სხულუხია მსოფლიოს ჩემპიონი 70 კილოგრამ წონით კატეგორიაში გახდა. ფინალის გზაზე მან კანადელი, იაპონელი და უკრაინელი მეტოქეები დაამარცხა, ოქროს მედლისთვის ბრძოლაში კი რუსეთის ნაკრების წევრ ჩერმან ვალიევს აჯობა.
გაფრინდაშვილმა 79 კილოგრამი წონითი კატეგორიის წინასწარ შეხვედრებში ეგვიპტელ, ამერიკელ და თურქ მოჭიდავეებს მოუგო, ხოლო მსოფლიოს ჩემპიონის ტიტული აზერბაიჯანელი აბუბაკარ აბაკაროვის სუფთად დამარცხებით გაინაღდა.
თავისუფალი სტილით ჭიდაობაში მსოფლიოს ჩემპიონატი დღეს დასრულდება. მედლებისთვის საქართველოს ნაკრების კიდევ ორი წევრი იბრძოლებს - გიორგი სულავა (74 კგ) და ზურიკო ურთაშვილი (125 კგ) რეპეშაჟის ფინალში არიან და, თუ გადამწყვეტ შეხვედრაშიც იმარჯვებენ, მსოფლიოს ბრინჯაოს პრიზიორები გახდებიან.
