კოსოვოს პარლამენტის ვადამდელი არჩევნების წინასწარი შედეგებით, გამარჯვება მოიპოვეს ოპოზიციურმა პარტიებმა, რომლებიც მხარს უჭერენ სერებთთან ურთიერთობის მოსაგვარებლად დიალოგის განახლებას.
წინასწარი მონაცემებით, 6 ოქტომბერს ჩატარებულ არჩევნებში ხმების 26% მიიღო მემარცხენე ნაციონალისტურმა პარტიამ Vetevendosje (თვითგამორკვევა) და 25% „კოსოვოს დემოკრატიულმა ლიგამ“(LDK).
კოსოვოს ხელისუფლებაში 2007 წლიდან მყოფ „დემოკრატიულ პარტიას,“ რომელიც თავის დროზე ჩამოყალიბდა როგორც „კოსოვოს განთავისუფლების არმიის“ პოლიტიკური ფრთა, ხმა მისცა არჩევნებში მონაწილეთა 21%-მა. მხოლოდ 12% მიიღო მმართველი კოალიციის წევრმა - „ალიანსმა კოსოვოს მომავლისთვის“.
LDK-ს ლიდერის, ვიოსა ოსმანის გარდა, პრემიერ-მინისტრობის ყველა პოტენციური კანდიდატი წარსულში „კოსოვოს განთავისუფლების არმიის“ წევრი იყო. ალბანელი სეპარატისტების ეს შეიარაღებული დაჯგუფება 1998-99 წლებში იბრძოდა სერბეთის ხელისუფლების წინააღმდეგ. კონფლიქტი ბელგრადის მარცხით დასრულდა მას შემდეგ, რაც ეთნიკური ალბანელების დასახმარებლად საომარ მოქმედებებში ნატო ჩაერია. რეგიონმა სერბეთისგან დამოუკიდებლობა 2008 წელს მოიპოვა.
კოსოვოში ვადამდელი საპარლამენტო არჩევნები მას შემდეგ დაინიშნა, რაც ივლისში თანამდებობიდან გადადგა პრემიერ-მინისტრი რამუშ ჰარადინაჯი. გადადგომას წინ უძღოდა მისი დაბარება ჰააგის ტრიბუნალში. ტრიბუნალს აინტერესებს, რა როლს ასრულებდა ჰარადინაჯი, როგორც „კოსოვოს განთავისუფლების არმიის“ მეთაური სერბებთან ომის დროს.
