ბელორუსიის პრეზიდენტმა, ალექსანდრ ლუკაშენკომ გადაწყვიტა ხელი მოაწეროს ხელშეკრულებას, რომელიც ბელორუსიის მოქალაქეებს გაუიოლებს სავიზო რეჟიმს ევროკავშირის წევრ ქვეყნებში სამოგზაუროდ.
ბელორუსიის საგარეო საქმეთა სამინისტროს პრესმდივანმა, ანატოლ ჰლაცმა 20 სექტემბერს მინსკში უთხრა ჟურნალისტებს, რომ ლუკაშენკოს "ესმის ამ ნაბიჯის მნიშვნელობა ჩვენი მოსახლეობის მობილობისთვის, მას შემდეგ, რაც ყურადღებით გააანალიზა ყველა შესაძლო რისკი და შედეგი". ჰლაცმა დასძინა, "ჩვენ ყოველთვის ვუჭერდით მხარს ადამიანურ და ბიზნესკონტაქტებსო". მისი თქმით, ხელშეკრულების რატიფიკაცია ბელორუსიის პარლამენტმა უნდა მოახდინოს და შემდეგ ის ევროპის პარლამენტმა უნდა მიიღოს.
ჰლაცის განცხადებამდე სამი დღით ადრე, პოლიტიკურ საკითხებში აშშ-ის სახელმწიფო მდივნის მოადგილემ, დევიდ ჰეილმა მინსკში თქვა, რომ ორი ქვეყანა აღადგენს ელჩების გაცვლას, 11-წლიანი პაუზის შემდეგ - იმ ფონზე, როცა არსებობს ერთობლივი შეშფოთება რუსეთის საგარეო-პოლიტიკური თავგადასავლების გარშემო. ჰეილი ამ განცხადებებით გამოვიდა ლუკაშენკოსთან მოლაპარაკების შემდეგ, რომელიც ქვეყანას საუკუნის მეოთხედია მართავს.
ბოლო წლებში გახშირდა შეხვედრები ვაშინგტონის და მინსკის ოფიციალურ წარმომადგენლებს შორის. გასულ თვეში ბელორუსიას ეწვია იმ დროს უსაფრთხოების საკითხებში პრეზიდენტის მრჩეველი, ჯონ ბოლტონი, რაც ორი ათწლეულის განმავლობაში თეთრი სახლის მაღალჩინოსნის პირველი ოფიციალური ვიზიტი იყო.
