ევროპისა და ამერიკის ასამდე საზოგადო მოღვაწემ მოაწერა ხელი ღია წერილს რუსეთში პოლიტიკური რეპრესიების წინააღმდეგ. წერილი შეადგინა მიხაილ ხოდორკოვსკის სამოქალაქო ორგანიზაციამ. ამის შესახებ იტყობინება The Moscow Times-ი.
მათ შორის, ვინც ხელი მოაწერა წერილს, არიან ბრიტანელი მსახიობი და მწერალი სტივენ ფრაი, ნობელის პრემიის ლაურეატი ჰერტა მიულერი, ირლანდიის, ლიეტუვისა და ბულგარეთის ყოფილი პრეზიდენტები, ასევე „სატახტოთა თამაშის“ სცენარისტები დევიდ ბენიოფი და დენიელ უაისი.
„ჩვენ, თავისუფალი მსოფლიოს მცხოვრებლები, მსოფლიო დემოკრატიის მომავლით შეფიქრიანებულნი, შეშფოთებით ვადევნებთ თვალს მოვლენებს, რომლებიც უკანასკნელი თვის განმავლობაში ვითარდება მოსკოვსა და რუსეთის სხვა ქალაქებში. რუსეთის მოქალაქეები საკუთარი მთავრობისგან ითხოვენ მხოლოდ და მხოლოდ უფლებებს, რომლებსაც, თავისუფალი მსოფლიოს მცხოვრებლები, მოცემულობად ვიღებთ“, - ნათქვამია წერილში. ავტორები ასევე მოუწოდებენ ყველას, ვისთვისაც „სულ ერთი არ არის დემოკრატია და ადამიანის უფლებები“, მიღებულ იქნეს ზომები, რათა „შეჩერდეს უკანონობა, რომელსაც პრეზიდენტ პუტინის რეჟიმი სჩადის“.
წერილის ხელმომწერები რუსეთის ხელისუფლებას მოუწოდებენ, შეწყდეს სისხლისსამართლებრივი დევნა აქტივისტებისა, რომლებიც მშვიდობიან საპროტესტო გამოსვლებში მონაწილეობდნენ. ასევე პასუხი აგებინონ პოლიციელებს, რომლებიც ამ აქციებზე „გაუმართლებლად იყენებდნენ ძალას“.
მანამდე ე.წ. მოსკოვის საქმეში ბრალდებულებისთვის მხარის დასაჭერად გამოვიდა ათობით კულტურის მოღვაწე, რუსეთის მართლმადიდებელი ეკლესიის მღვდელი, მასწავლებელი და მოსკოვის ქალაქის საბჭოს არჩეული დეპუტატი. ისინი გამოვიდნენ მოწოდებით, შეწყდეს პოლიტიკური რეპრესიები და დაიხუროს მასობრივი არეულობის შესახებ საქმე, რომელიც საგამოძიებო კომიტეტმა აღძრა მოსკოვის საპროტესტო გამოსვლების შემდეგ.
„მოსკოვის საქმეზე“ დაკავებულია 16 პირი. ექვს მათგანს უკვე მიესაჯა საერთო ჯამში 15 წლით თავისუფლების აღკვეთა პოლიციასთან შეტაკებისთვის, რომელიც შლიდა მოსკოვის ქალაქის საბჭოს დაურეგისტრირებელი კანდიდატების მხარდასაჭერ მიტინგს. მათ შორისაა პაველ უსტინოვი, რომელსაც სასამართლომ 16 სექტემბერს სამ-ნახევარი წლით პატიმრობა მიუსაჯა, თითქოს, რუსეთის გვარდიის თანამშრომლისთვის მხარის ამოგდებისთვის.
უფლებადამცველები მიიჩნევენ, რომ მოსკოვში არაფერი მომხდარა ისეთი, რის კვალიფიკაცია შეიძლებოდეს „მასობრივ არეულობად“ და „პოლიციელების მიმართ ძალის გამოყენებად“. მათი აზრით, სისხლის სამართლის საქმეთა უმრავლესობა შეთითხნილია.
