ჰოლივუდური ბლოკბასტერის, "Fast and Furious 9"-ის ეპიზოდების გადაღების მიზნით, 2 სექტემბრიდან გადაკეტილია რუსთავის მესხიშვილისა და თოდრიას ქუჩები. ზოგ ადგილას დადგმულია დამცავი რკინისა და ბეტონის ჯებირები, შეცვლილია სამგზავრო ტრანსპორტის მარშრუტები.
Universal Pictures-ის გადამღები ჯგუფის ქართველი პარტნიორების წარმომადგენელმა რადიო თავისუფლებას უთხრა, რომ ამჟამად მოსამზადებელი სამუშაოები მიმდინარეობს: "გადაღებებს 3 სექტემბერს დილიდან დავიწყებთ. იქ, სადაც ბეტონის ჯებირებია, ყველაზე მძაფრი სცენები გათამაშდება".
გადაღებების დროს შეიზღუდება ფეხით გადაადგილება, დაიხურება ათეულობით ოფისი და სავაჭრო ობიექტი. ადგილობრივმა მოვაჭრეებმა რადიო თავისუფლებას უთხრეს, რომ ყოველი გაცდენილი დღისთვის კომპენსაციას გადაუხდიან. რუსთავში ფილმის სცენებს 3-7 სექტემბერს გადაიღებენ. Universal Pictures-ი გადაღებებს აწარმოებს თბილისშიც, პარალელურად - აშშ-სა და ევროპაში.
