აშშ-ის სპეციალურმა წარმომადგენელმა ჩრდილოეთ კორეის საკითხებში სტივენ ბიგანმა განაცხადა, რომ არ დაიკავებს რუსეთში აშშ-ის საგანგებო და სრულუფლებიანი ელჩის თანამდებობას.
„ამერიკის ხმის“ ინფორმაციით, ბიგანმა უარი იმით ახსნა, რომ სურს მთელი ძალისხმევა მიმართოს ჩრდილოეთ კორეის ბირთვული განიარაღების პროცესში პროგრესის მიღწევისკენ.
სტივენ ბიგანმა, რომელიც სეულში იმყოფება სამხრეთ კორეის ხელისუფლებასთან მოლაპარაკების მიზნით, განაცხადა, რომ ვაშინგტონი ფხენიანთან მოლაპარაკებას გააგრძელებს, როგორც კი ჩრდილოეთ კორეა ამისთვის მზად იქნება.
ინფორმაცია, რომ აშშ-ის პრეზიდენტი დონალდ ტრამპი რუსეთში ელჩის თანამდებობაზე სტივენ ბიგანის კანდიდატურას განიხილავდა, აგვისტოს შუა რიცხვებში გავრცელდა.
რუსეთში შეერთებული შტატების ამჟამინდელი ელჩი ჯონ ჰანსტმენი თანამდებობას 3 ოქტომბერს ტოვებს.