რუსთაველის გამზირზე, პარლამენტის შენობის წინ საპროტესტო აქცია მიმდინარეობს. უცვლელია ერთადერთი მოთხოვნა - გადადგეს შს მინისტრი გიორგი გახარია.
„გიორგი გახარიას შს მინისტრის პოსტზე დატოვებით „ქართული ოცნება“ იღებს დიდ პოლიტიკურ ზიანს. ეს მათ კარგად იციან, უბრალოდ გაძლებაზე გვეთამაშებიან... მათ დიდი ხანი მოუწევთ გაძლება... რადგან ჩვენი ფანტაზია ახლაღა ჩაირთო. მანამდე ცოტა ცაიტნოტის რეჟიმში ვიყავით. ახლა პროცესებს ვალაგებთ და უფრო მრავალფეროვანსა და დახვეწილს ვქმნით ჩვენს პროტესტს... ჩვენ გაძლებაზე არ ვართ, ყოველდღე გვაქვს ადამიანის უფლებების ზეიმი “, - განაცხადა აქციის ერთ-ერთმა ორგანიზატორმა, შოთა დიღმელაშვილმა.
აქციაზე გააპროტესტეს შს მინისტრის პირველი მოადგილის, კახა საბანაძის კომენტარი იმასთან დაკავშირებით, რომ 20-21 ივნისს რუსთაველის გამზირზე „მშვიდობიანი მომიტინგე, ძირითადად, არ დაშავებულა“. აქციის ორგანიზატორები ამბობენ, რომ სწორედ მშვიდობიან მომიტინგეებს წარმოადგენდნენ თვალებდათხრილი და დასახიჩრებული ადამიანები და სწორედ მშვიდობიან მომიტინგეებს დასდევდნენ სამართალდამცველები ქუჩებსა და სადარბაზოებში.
„ნაცვლად იმისა, რომ თავი დახარონ და ერთი ბოდიში ფორმალურად მაინც მოიხადონ, პასუხისმგებლობა გადააქვთ იმ ადამიანებზე, რომლებიც სამართლიანად აღშფოთდნენ საქართველოს პარლამენტის თავმჯდომარის სავარძელში რუსეთის დუმიდან გამოგზავნილი ჭ-კლასის ფუნქციონერის ხილვით - რომელიც კომუნიზმისა და მართლმადიდებლობის ტოქსიკურ კოქტეილს წარმოადგენს“, - განაცხადა შოთა დიღმელაშვილმა.
პარლამენტის შენობის წინ მიმდინარე საპროტესტო აქციაზე შუახნის კაცმა პირის ამოკერვა სცადა. ეს აქტი შეთანხმებული არ იყო აქციის ორგანიზატორებთან. აქციის მონაწილეებმა შეძლეს მისი შეჩერება და სასწრაფო დახმარება გამოიძახეს.