გამოძიება განწირულია, - განაცხადა „ევროპული საქართველოს“ ერთ-ერთმა ლიდერმა გიგი უგულავამ თბილისის საქალაქო სასამართლოში, სადაც იგი 20-21 ივნისს რუსთაველის გამზირზე მომხდარი მოვლენების გამოძიების საქმეზე გამოკითხვაზე იმყოფება.
გამოკითხვაზე შესვლამდე მედიასთან გაკეთებულ კომენტარში გიგი უგულავამ აღნიშნა, რომ „გავრილოვის ღამის“ გამოძიებას გიორგი გახარია ბარონ მიუნჰაუზენივით აპირებს, საკუთარი თავის ჭაობიდან ამოყვანას ქაჩალზე მოკიდებით ცდილობს“ და არ გასცემს პასუხს შეკითხვაზე, ვინ გასცა აქციის მონაწილეთა დარბევის ბრძანება.
„ვხედავთ, რომ სულ სხვა მიმართულებით მიყავს საქმე და რეალურად არ აპირებს გასცეს პასუხი, ვინ გასცა ბრძანება ამ სისხლიან დარბევაზე, ვინ ესროლა მაკო გომურს და დანარჩენ მოქალაქეებს, რომლებმაც მზერა დაკარგეს და დასახიჩრდნენ და სიცოცხლისთვის იბრძვიან.
ამ მიმართულებით საერთოდ ჩაგდებულია . ასევე გამოსაძიებელია, რატომ მოხდა ისე, როცა გახარიას ინიციატივით უნდა შემდგარიყო შეხვედრა და ყველა წინაპირობა იყო, რომ სიტუაცია განმუხტულიყო, მოლაპარაკების ნაცვლად მივიღეთ გაზის ტყვიების დაშენა მომტინგეების მისამართით.
ეს არის ის თემები, რომელიც აუცილებლად უნდა დამაგრდეს სამართლებრივად დღეს იმისათვის, რომ ხვალ, როცა მეტნაკლებად იქნება შესაბამისი სიტუაცია თავისუფალი გამოძიების, ამ კითხვებზე გაეცეს პასუხი.
მე არ მაქვს ილუზია, რომ დღეს, ხვალ და ამ ხელისუფლების პირობებში მოხდება ეს, მაგრამ ოდნავ დამოუკიდებელი სასამართლოს პირობებში, ეს ლეგიტიმური ინტერესი ამ კითხვებზე უნდა დაკმაყოფილდეს", - აღნიშნა გიგი უგულავამ თბილისის საქალაქო სასამართლოში.
იგი გამოძიების კითხვებს პასუხს მაგისტრი მოსამართლის თანდასწრებით პასუხობს.
შინაგან საქმეთა სამინისტროს თანახმად, გიგი უგულავა გამოკითხვაზე სსკ-ის 225-ე მუხლით მიმდინარე გამოძიების ფარგლებში, 20-21 ივნისს პარლამენტის შენობის წინ მიმდინარე აქციაზე ჯგუფური ძალადობის ორგანიზებისა და მასში მონაწილეობის ფაქტზე დაიბარეს.
გასულ კვირას, მაგისტრი მოსამართლის თანდასწრებით დაიკითხა "ერთიანი ნაციონალური მოძრაობის" ერთ-ერთი წევრი, გია ბარამიძე. გამოკითხვაზე დაბარებულია ასევე "გამარჯვებული საქართველოს" თავმჯდომარე ირაკლი ოქრუაშვილი.