დომოდედოვოს აეროპორტში „როსპოტრებნადზორის“ თანამშრომლებმა შეამოწმეს ავიაკომპანია "ურალის ავიახაზების" ბათუმი-მოსკოვი რეისით ჩასული მგზავრები.
„როსპოტრებნადზორის“ (მომხმარებელთა უფლებებისა და ადამიანის კეთილდღების დაცვის სფეროში მეთვალყურეობის ფედერალური სამსახური) პრეს-სამსახურის ცნობით, რომელსაც სააგენტო „მოსკოვი“ ავრცელებს, შემოწმების მიზანი იყო „რუსეთის ტერიტორიაზე ინფექციურ დაავადებათა გავრცელების აღკვეთა“.
მანამდე სოციალური ქსელებით გავრცელდა ინფორმაცია, რომ მგზავრები ნახევარი საათით დააყოვნეს თვითმფრინავში.
ინფექციური დაავადებების გამოსავლენად მედმუშაკები, „როსპოტრებნადზორის“ თანახმად, უკონტაქტო თერმომეტრებს იყენებდნენ. ერთ ბავშვს გაუზომეს 38 გრადუსი და დაუსვეს „ფარინგიტის“ დიაგნოზი.
„როსპოტრებნადზორს“ არ განუმარტავს, რატომ შეამოწმა მაინცდამაინც ეს რეისი, რომლითაც არ გადაჰყავდათ სახიფათო ინფექციური დაავადებების მქონე ადამიანები.
ინციდენტის ფონია მორიგი დაძაბულობა საქართველო-რუსეთის ურთიერთობაში. რუსეთის პრეზიდენტმა 8 ივლისს გასცა ბრძანება საქართველოსთან პირდაპირი საჰაერო კავშირის შეწყვეტის შესახებ.
ხოლო „როსპოტრებნადზორმა“ გამოაცხადა, რომ ბოლო ხუთი წლის განმავლობაში სტანდარტებთან შეუსაბამო ალკოჰოლური პროდუქციის იმპორტის მოცულობა საქართველოდან სამჯერ გაიზარდა.
უწყების ინფორმაციით, სტანდარტებს ვერ აკმაყოფილებენ კომპანიები „ბაგრატიონი 1882", „ბოლერო ენდ კომპანი“, „კახეთის ტრადიციული მეღვინეობა“, „ბადაგონი“, „ქართული ღვინის სახლი“, კორპორაცია ქართული ღვინო“, „ქართული ღვინისა და ალკოჰოლური სასმელების კომპანია“, „ბატონო“.
