29 ივნისს, 19:00 საათზე, რესპუბლიკის მოედნიდან თავისუფლების მოედნისკენ გაიმართება „თავისუფლების მარში“.
ამის შესახებ განცხადება გააკეთა პარლამენტის წინ გამართული აქციის ერთ-ერთმა ორგანიზატორებმა და წამყვანმა შოთა დიღმელაშვილმა:
„შაბათს მეათე დღე შესრულდება რაც აქ ვდგავართ. მეათე დღეს, გამოდით სახლებიდან, გამოდით უნივერსიტეტებიდან, გამოდით უბნებიდან, გამოდით საჯარო სტრუქტურებიდან, პოლიციიდანაც გამოდით, მთელი საქართველო გამოდით. რესპუბლიკის მოედანზე, გამოდით ყველა. მთელი ქართული სამოქალაქო საზოგადოება ხელს შეუწყობს ერთმანეთს და წავალთ თავისუფლებისკენ“.
აქციების მეშვიდე დღეს, დემონსტრანტების ერთადერთ მოთხოვნად რჩება შს მინისტრის, გიორგი გახარიას გადადგომა. დემონსტრანტების თქმით, სწორედ ის არის პასუხისმგებელი 20-21 ივნისს, პარლამენტის წინ და მის მიმდებარე ტერიტორიაზე განვითარებულ მოვლენებზე.
აქციის მონაწილეების ორი მოთხოვა, 2020 წელს, საპარლამენტო არჩევნების პროპორციული წესით ჩატარება და დაკავებული დემონსტრანტების გათავისუფლება, შესრულებულია.
რუსთაველის გამზირზე საპროტესტო აქციები 20 ივნისს, მას შემდეგ დაიწყო, რაც თბილისში, საპარლამენტთაშორისო მართლმადიდებლობის ასამბლეის ფარგლებში, რუსეთის დუმის დეპუტატმა, სერგეი გავრილოვმა, პარლამენტის სხდომათა დარბაზში, პარლამენტის თავმჯდომარის სავარძლიდან გახსნა ასამბლეა და ასამბლეის წევრებს სიტყვით მიმართა.
