რუსთაველის გამზირზე მიმდინარე აქციის ერთ-ერთი წამყვანი, სამოქალაქო აქტივისტი გიორგი მაქარაშვილი ეხმაურება პარლამენტის გადაწყვეტილებას „ნაციონალური მოძრაობის“ წევრის, ნიკა მელიასთვის იმუნიტეტის შეჩერების თაობაზე.
პარლამენტის წინ სიტყვით გამოსვლისას მან თქვა: „დღეს შეეცადნენ, რომ პოლიტიკური ჭრილიდან შეეტიათ აქციისთვის და ნიკა მელიას იმუნიტეტი შეუჩერეს და გეგმავენ მის დაჭერას. ბევრი კითხვა ისმის, რა მოხდება აქციაზე, იცით რა არის? ისე, როგორც მართალ ადამიანებს ეკადრებათ, ჩვენ უნდა გვქონდეს ჩვენი პოზიცია. თუ დამტკიცდა, რომ ვინმე დამნაშავეა, ის უნდა დაისაჯოს, მაგრამ პირველი დამნაშავე გახარიაა. ჯერ გახარია დაიჭირეთ“.
პარლამენტის წინ მეშვიდე დღეა საპროტესტო აქციები მიმდინარეობს.
აქციების მეშვიდე დღეს, დემონსტრანტების მთავარ მოთხოვნად რჩება შს მინისტრის, გიორგი გახარიას გადადგომა. დემონსტრანტების თქმით, სწორედ ის არის პასუხისმგებელი 20-21 ივნისს, პარლამენტის წინ და მის მიმდებარე ტერიტორიაზე განვითარებულ მოვლენებზე.
სხვა მიდგომა აქვს 20-21 ივნისს განვითარებულ მოვლენებთან დაკავშირებით ხელისუფლებას. პროკურატურა ნიკა მელიას ბრალად სდებს 20-21 ივნისს, საქართველოს პარლამენტთან გამართულ აქციაზე ჯგუფური ძალადობის ორგანიზებაში, ხელმძღვანელობასა და მონაწილეობაში.
ბრალდების საფუძველზე 26 ივნისს, პარლამენტმა ნიკა მელიას დეპუტატის იმუნიტეტი შეუჩერა.
