საქართველოს პარლამენტის წევრი „ნაციონალური მოძრაობიდან“ ნიკა მელია არ მივიდა გენერალურ პროკურატურაში, სადაც 10 საათზე იყო დაბარებული ბრალდების წარსადგენად.
მელიას ბრალად ედება 20-21 ივნისს, საქართველოს პარლამენტთან გამართულ აქციაზე ჯგუფური ძალადობის ორგანიზება, ხელმძღვანელობა და მონაწილეობა.
"მიუხედავად იმისა, რომ ნიკანორ მელიას ჰქონდა გამოცხადების ვალდებულება, მან თავი აარიდა სამართალდამცავ ორგანოში გამოცხადებას, რის გამოც დადგენილება, საქართველოს სისხლის სამართლის კოდექსის 225-ე მუხლის პირველი და მეორე ნაწილებით ნიკანორ მელიას ბრალდების შესახებ, გაეცნო მისი ინტერესების დამცველ ადვოკატს“ - ნათქვამია პროკურატურის განცხადებაში.
გენერალური პროკურატურა კვლავ აღნიშნავს, რომ გამოძიების მიერ მოპოვებული მტკიცებულების საფუძველზე, ჯგუფური ძალადობის ხელმძღვანელობისა და მასში მონაწილეობისთვის მელიას მიმართ ბრალდების დადგენილება გამოიტანა 2019 წლის 25 ივნისს.
პროკურატურის ინფორმაციით, ბრალდებულს ან მისი ინტერესების დამცველ ადვოკატს, გამოძიების მიერ ამ ეტაპისთვის მოპოვებული მტკიცებულებები გადაეცემა კანონით განსაზღვრულ ვადაში - ბრალდებულის სასამართლოში პირველ წარდგენამდე.
გენერალურმა პროკურატურამ პარლამენტს მიმართა ბრალდებულის მიმართ პატიმრობის გამოსაყენებლად კანონით გათვალისწინებული თანხმობის მიღების წინადადებით.
