საქართველოს საგარეო საქმეთა სამინისტროში უარყოფენ ინფორმაციას პროტესტის ნიშნად ელჩის გადადგომის შესახებ.
"გაიჟღერა ინფორმაციამ, მათ შორის სოციალურ ქსელებში რომ საქართველოს ერთ-ერთმა ელჩმა, განვითარებული მოვლენების ფონზე დატოვა თანამდებობა. აღნიშნული წარმოადგენს დეზინფორმაციას და არ შეესაბამება სინამდვილეს. საგარეო საქმეთა სამინისტროს ყველა ქვედანაყოფი, როგორც საელჩოები, ისე საკონსულო ჩვეულ რეჟიმში აგრძელებენ საქმიანობას“ - განაცხადა საქართველოს საგარეო საქმეთა სამინისტროს ოფიციალურმა წარმომადგენელმა, ვლადიმერ კონსტანტინიდიმ.
მისი კომენტარი მოჰყვა გავრცელებულ ცნობებს იმის შესახებ, რომ საქართველოში რუსეთის დუმის დეპუტატების ვიზიტისადმი პროტესტის ნიშნად გადადგნენ პოლონეთსა და რუმინეთში საქართველოს ელჩები.
რაც შეეხება საქართველოს პარლამენტში რუსი დეპუტატის, სერგეი გავრილოვის მიერ მართლმადიდებლობის საპარლამენტთაშორისო ასამბლეის სხდომის წაყვანას, საგარეო საქმეთა სამინისტროში აცხადებენ, რომ ამ ფორმატით ჩატარებულ ღონისძიებას კატეგორიულად ვემიჯნებიან.
„საგარეო საქმეთა სამინისტრო წარმოადგენს იმ უწყებას, რომელიც გამუდმებით აყენებს საკითხს ქვეყნის დეოკუპაციის შესახებ და მუშაობს ამ თემაზე. ეს არის ჩვენი ერთ-ერთი მთავარი პრიორიტეტი და ჩვენ მუდმივად ვაყენებთ რუსეთის პასუხისმგებლობის საკითხს და წარმოვაჩენთ მის ნამდვილ სახეს.“ - თქვა ვლადიმერ კონსტანტინიდიმ.
