რუსეთის დუმა და საგარეო საქმეთა სამინისტრო თავის ოფიციალურ ვებსაიტებზე საქართველოს პარლამენტიდან რუსი დეპუტატის სერგეი გავრილოვის გაძევების შესახებ ინფორმაციას ავრცელებენ.
“რუსმა პარლამენტარებმა საქართველოს პარლამენტის შენობა, რადიკალების მიერ შენობის დაკავების გამო დატოვეს”- წერს რუსეთის სათათბირო თავის ოფიციალურ გვერდზე და ამავე ცნობას ავრცელებს რუსეთის საგარეო საქმეთა სამინისტროც ფეისბუქის ოფიციალურ გვერდზე.
სამოქალაქო საკითხებისა და რელიგიური გაერთიანებების კომიტეტის თავმჯდომარის, მართლმადიდებლობის საპარლამენტთაშორისო ასამბლეის პრეზიდენტის სერგეი გავრილოვის განცხადებით შენობა რადიკალებმა დაიკავეს, რის გამოც დეპუტატებს საქართველოს პარლამენტის დატოვება “დაცვის თანხლებით მოუწიათ” - წერია ოფიციალურ გვერდზე რომელსაც თან ახლავს თეგები :# რუსეთ #საქართველო # პარლამენტი #მართლმადიდებლობა # რელიგია.
რუსეთის საგარეო საქმეთა სამინისტროს ოფიციალურ ვებგვერდზე ამ პოსტისქვეშ ასობით ადამიანი ტოვებს კომენტარს, რომელთა უმრავლესობაში წერია, რომ მოვლენების განვითარების ეს ვერსია დამახინჯებულია, რუსეთი კი ოკუპანტია.
