რუსეთის დუმის დეპუტატი სერგეი გავრილოვი აცხადებს, რომ საქართველოს პარლამენტში მართლმადიდებლობის საპარლამენტთაშორისო ასამბლეის სხდომა ჩაიშალა რადიკალების ექსტრემისტული აქციის გამო.
გავრილოვმა სააგენტო „რია“-ს უთხრა, რომ საფრთხის გამო ყველა დელეგაციამ პარლამენტის შენობა დატოვა და ამჟამად უსაფრთხოდ იმყოფებიან.
გავრილოვის თქმით, საქართველოს პარლამენტში ჩატარდა ექსტრემისტული აქცია ანგარიშსწორების მუქარით და რუსეთის პრეზიდენტის დისკრედიტაციის მცდელობით. „მოითხოვდნენ ჩემს გადაცემას იმის გამო, რომ აფხაზეთის კონფლიქტებში ვმონაწილეობდი. მე განვაცხადე, რომ არასადროს არანაირ შეიარაღებულ კონფლიქტებში მონაწილეობა არ მიმიღია არც აფხაზეთში და არც სხვა ნებისმიერ ქვეყანაში“ - აცხადებს გავრილოვი.
დუმის კომუნისტი დეპუტატის ინფორმაციით, ამჟამად ასამბლეის სხდომის გაგრძელებაზე ფიქრობენ. „კოლეგებმა მხარი დაგვიჭირეს, რომ რუსეთის გარეშე სხდომის ჩატარება არ შეიძლება. მე როგორც ასამბლეის პრეზიდენტი სხდომას ჩავატარებ, რადგან ის დაგეგმილია და ბევრი ქართველი დეპუტატი მხარს გვიჭერს“ - განაცხადა გავრილოვმა.
საქართველოს პარლამენტში დაწყებიდან რამდენიმე ხანში ჩაიშალა მართლმადიდებლობის საპარლამენტთაშორისო ასამბლეის 26-ე სესია მას შემდეგ, რაც რუსეთის დუმის კომუნისტი დეპუტატის, სერგეი გავრილოვის მიერ დილის სხდომის წაყვანას მოჰყვა მწვავე პროტესტი პროდასავლური ოპოზიციის და სამოქალაქო აქტივისტების მხრიდან.
გავრილოვის მიერ საქართველოს პარლამენტის თავმჯდომარის ადგილიდან სხდომის წაყვანა გააპროტესტეს "ქართული ოცნების" წარმომადგენლებმაც.
