დღეს ბაქოში იწყება საქართველოსა და აზერბაიჯანის სახელმწიფო საზღვრის დელიმიტაციის კომისიის ორდღიანი სხდომა. დელეგაციებს უხელმძღვანელებენ საგარეო საქმეთა მინისტრის მოადგილეები ლაშა დარსალია და ხალაფ ხალაფოვი.
სახელმწიფო საზღვრის დელიმიტაციის კომისიის მუშაობა რამდენიმე წლის განმავლობაში შეჩერებული იყო. მოლაპარაკების განახლების აუცილებლობა მას შემდეგ დადგა, რაც აპრილის ბოლოს აზერბაიჯანელი მესაზღვრეების მიერ დავით გარეჯის კომპლექსის უდაბნოს მონასტერთან გზის გადაკეტვას საპროტესტო აქციები მოჰყვა.
მაისის დასაწყისში საქართველოს მთავრობამ სახელმწიფო კომისიის შემადგენლობა განაახლა და მის ხელმძღვანელად საგარეო საქმეთა მინისტრის მოადგილე ლაშა დარსალია დანიშნა.
14 მაისს ბაქოში გაიმართა ლაშა დარსალიას პირველი სამუშაო შეხვედრა აზერბაიჯანის საგარეო საქმეთა მინისტრის მოადგილესთან, ხალაფ ხალაფოვთან.
ამ შეხვედრის შემდეგ საქართველოს საგარეო საქმეთა სამინისტროს მიერ გავრცელებულ განცხადებაში ნათქვამი იყო, რომ „ორი ქვეყნის წარმომდგენლებმა ხაზი გაუსვეს საკითხის მნიშვნელობას და აღნიშნეს, რომ მიუღებელია საკითხის ირგვლივ ნებისმიერი სახის პროვოკაციები. მხარეები შეთანხმდნენ, რომ დელიმიტაციის პროცესის მიმდინარეობისას იხელმძღვანელებენ სტრატეგიული პარტნიორობის სულისკვეთებით, ხოლო დავით გარეჯის კომპლექსის მიმდებარე სასაზღვრო ზოლის პრობლემატიკას დაუბრუნდებიან შემდეგ შეხვედრაზე.“
საქართველოს საგარეო საქმეთა სამინისტროს ინფორმაციით, აზერბაიჯანთან შეთანხმებულია სახელმწიფო საზღვრის დაახლოებით ორი მესამედი.