აზერბაიჯანელი მესაზღვრეების მხრიდან დავით გარეჯის უდაბნოს მონასტერში გადაადგილების შეზღუდვას ადასტურებს საგარეო საქმეთა სამინისტრო. როგორც უწყების წარმომადგენელი ვლადიმერ კონსტანტინიდი აცხადებს, ქართულმა მხარემ უკვე მიმართა აზერბაიჯანულ მხარეს - „გადამსვლელი ნაკადის“ შეზღუდვის აღმოფხვრის მიზნით.
„ჩვენს ხელთ არსებული ინფორმაციით, აზერბაიჯანელი მესაზღვრეების მხრიდან განხორციელდა ქედს მიღმა გადამსვლელი ნაკადის შეზღუდვა. ამის შესახებ როგორც საგარეო საქმეთა სამინისტრომ, ასევე ჩვენი საზღვრის დაცვის სამსახურმა ჩვენს კოლეგებს მივმართეთ და აღნიშნულთან დაკავშირებით აქტიური კომუნიკაცია მიმდინარეობს.
ვმუშაობთ ამ საკითხის დარეგულირებაზე. ვითხოვთ, რომ შეუფერხებლად მოხდეს იქ პილიგრიმების, ტურისტების, მრევლის გადაადგილება და მინდა გითხრათ, რომ კომუნიკაცია მიმდინარეობს პარტნიორულ ატმოსფეროში, სულისკვეთებით”, – აღნიშნა კონსტანტინიდიმ ჟურნალისტებთან საუბრისას.
საგარეო საქმეთა სამინისტროს წარმომადგენელი აღნიშნავს, რომ მოლაპარაკებებს გარკვეული დრო დასჭირდება და იმისთვის, რომ პროცესის ხელშეშლა არ მოხდეს, მიზანშეწონილია, რომ ყველამ შეიკავოს თავი „ემოციური ქმედებებისა და განცხადებებისგან“.
აზერბაიჯანელი მესაზღვრეების მიერ უდაბნოს მონასტერში გადაადგილების შეზღუდვასთან დაკავშირებით ინფორმაცია 25 აპრილს გავრცელდა. როგორც დავით გარეჯის მამათა მონასტრის არქიმანდრიტმა, კირიონმა განუცხადა „ინტერპრესნიუსს“, აზერბაიჯანელი მესაზღვრეები ტერიტორიაზე უკვე აღარც სასულიერო პირებს უშვებენ.
„მეზობელი ქვეყნის მესაზღვრეები ბილიკებზე მუშაობენ, გამაფრთხილებელ და ამკრძალავ ნიშნებს არჭობენ, რასაც მშვიდად უყურებენ ქართველი მესაზღვრეები. ისეთივე კრიზისული და უარესი მდგომარეობა იქმნება, როგორც 2012 წლის მაისში, როდესაც საქართველოს ხელისუფლებამ ქართველ მესაზღვრეებს უბრძანა, ტურისტები არ გაატაროთო. მაშინ ასე ითხოვდნენ აზერბაიჯანელები და ქართულმა მხარემ რატომღაც,
ვიდრე ხმაური არ ავტეხეთ, მეზობლის მოთხოვნა დააკმაყოფილა. თუმცა, სასულიერო პირებს მონასტერსა და ტაძრებში ასვლის უფლება ჰქონდათ, დღეს კი, ჩვენც აღარ გვიშვებენ“ - განაცხადა არქიმანდრიტმა კირიონმა.
არქიმანდრიტის ინფორმაციით, საზღვრის ჩაკეტვის მიზეზზე ქართული სასაზღვრო სექტორის უფროსი ესაუბრა აზერბაიჯანის სექტორის უფროსს, რომელმაც თქვა, რომ პრობლემა არ იქნება, თუ მისი ზემდგომებისგან საქართველოს ხელისუფლება სიტუაციის შეცვლას მოითხოვს. არქიმანდრიტის თქმით, დღეს არსებული მდგომარეობა საქართველოს პრეზიდენტის ვიზიტის შემდეგ შეიქმნა.
