საუდის არაბეთში სამშაბათს სიკვდილით დასაჯეს ტერორიზმში ბრალდებული 37 ადამიანი. ამის შესახებ CNN-ი იტყობინება საუდის არაბეთის შინაგან საქმეთა სამინისტროზე დაყრდნობით. დასჯილთა უმრავლესობა შიიტური რელიგიური უმცირესობის წარმომადგენელი იყო.
ოფიციალურ განცხადებაში ხელისუფლებამ მსჯავრდებულებს ბრალი დასდო „ექსტრემისტული და ტერორისტული იდეოლოგიის“ გავრცელებაში, ასევე „ტერორისტული უჯრედების“ შექმნის მცდელობაში რელიგიურ ნიადაგზე კონფლიქტების გაღვივების მიზნით.
როგორც იტყობინებიან, განაჩენი ქვეყნის სხვადასხვა რეგიონში მოიყვანეს სისრულეში.
სიკვდილით დასჯილთა შორის, სულ მცირე, 33 შიიტია. 11 მათგანი 2013 წელს დააპატიმრეს ირანის სასარგებლოდ ჯაშუშობის ბრალდებით, იტყობინება საერთაშორისო უფლებადამცველი ორგანიზაცია „ჰიუმენ რაიტს უოჩი“. დანარჩენები თითქოს მონაწილეობას იღებდნენ მასობრივ არეულობებში საუდის არაბეთის ხელისუფლების წინააღმდეგ მიმართული აქციებისას 2012 წელს.
წელს საუდის არაბეთში 146 ადამიანი დასაჯეს სიკვდილით.
საუდის არაბეთში მასობრივი სიკვდილით დასჯა უკანასკნელად მოხდა 2016 წელს. მაშინ ხელისუფლებამ ერთ დღეში დასაჯა სიკვდილით 47 ადამიანი, მათ შორის ცნობილი შიიტი მოღვაწე, შეიხი ნიმრ ალ-ნიმრი. ამან მასობრივი პროტესტი გამოიწვია ირანში, რომლის უმრავლესობა შიიტური ისლამის მიმდევარია.
