ჭავჭავაძის გამზირზე მიმდინარე აქციაზე სტუდენტური ჯგუფის აქტივისტმა, გიორგი ღვინჯილიამ განაცხადა, რომ სოციალური სამართლიანობისთვის მებრძოლი სამოქალაქო ჯგუფები იწყებენ "სახალხო მოძრაობას, რომელიც იბრძოლებს ხალხის უფლებებისთვის" და ეკონომიკური ჩაგვრით დაზარალებულ ჯგუფებს, მათ შორის ტაქსის მძღოლებს, იპოთეკით დაზარალებულებს, დევლინებს მოუწოდა შეუერთდნენ ამ მოძრაობას.
ღვინჯილიას თქმით, ეს მოძრაობა ხელისუფლებას, რომელიც სოციალური სამართლიანობის მოთხოვნებს დიდი ხნის განმავლობაში უგულებელყოფს, აიძულებს დათმობაზე წავიდეს. "ეს ქვეყანა ეკუთვნის ბიძინას, გელა ბეჟუაშვილს, ძმებ შარანგიებს და ასე შემდეგ, ისინი ყველაფერს აზიან და დაშინებული ჰყავთ მშრომელი, პატიოსანი და რიგითი ადამიანები"- განაცხადა გიორგი ღვინჯილიამ, რომლის თქმით უახლოეს დროში გამოცხადდება მოძრაობის პირველი შეხვედრის დრო და ადგილი.
ჭავჭავაძის ქუჩაზე გაიმართა აქცია შრომის უსაფრთხოების მოთხოვნით, ერთ დღეში მას შემდეგ, რაც ამ უბანში მშენებლობას ორი მუშის სიცოცხლე შეეწირა. აქციის მონაწილეები მივიდნენ ქალაქის მერის, კახა კალაძის სახლთან, რადგან, მათი თქმით, კალაძე და ხელისუფლების სხვა წარმომადგენლები არ მივიდნენ დემონსტრანტებთან შესახვედრად.
მანამდე, ცოტა ხნით ადრე, დემონსტრანტებთან მივიდა სახალხო დამცველი, ნინო ლომჯარია, რომელმაც განაცხადა, რომ მისთვის ცნობილია აქციაზე ხუთი აქტივისტის დაკავების თაობაზე და მისი აპარატის წარმომადგენლები დაკავებულებს მოინახულებენ. ვრცელდება ცნობები, რომ პოლიციამ დააკავა ცოტნე ცხვედიანი, გიორგი კობახიძე, გიორგი სოფრომაძე, ვახუშტი მენაბდე და დავით სუბელიანი. შსს-ს ეს ცნობა ჯერჯერობით არ დაუდასტურებია.
აქცია გაიმართა მოწოდებებით „თბილისი სიკვდილის ქალაქია“, „სოლიდარობა მუშებს“. აქციის მონაწილეების თქმით, დაღუპულ მუშებზე პასუხისმგებლობა სწორედ ხელისუფლებამ უნდა აიღოს.
