ჭავჭავაძის ქუჩაზე მიმდინარე აქციის მონაწილეებმა გადაინაცვლეს ქალაქის მერის, კახა კალაძის სახლთან, რადგან, მათი თქმით, კალაძე და ხელისუფლების სხვა წარმომადგენლები არ მივიდნენ დემონსტრანტებთან შესახვედრად.
მანამდე, ცოტა ხნით ადრე, დემონსტრანტებთან მივიდა სახალხო დამცველი, ნინო ლომჯარია, რომელმაც განაცხადა, რომ მისთვის ცნობილია აქციაზე ხუთი აქტივისტის დაკავების თაობაზე და მისი აპარატის წარმომადგენლები დაკავებულებს მოინახულებენ.
ვრცელდება ცნობები, რომ პოლიციამ დააკავა ცოტნე ცხვედიანი, გიორგი კობახიძე, გიორგი სოფრომაძე, ვახუშტი მენაბდე და დავით სუბელიანი. შსს-ს ეს ცნობა ჯერჯერობით არ დაუდასტურებია.
აქცია იმართება მოწოდებებით „თბილისი სიკვდილის ქალაქია“, „სოლიდარობა მუშებს“, აქციის მონაწილეები ჭავჭავაძის 5 ნომერთან იმყოფებიან და პრემიერ-მინისტრისა და მთავრობის სხვა წევრების მისვლას ითხოვენ.
აქციის მონაწილეების თქმით, დაღუპულ მუშებზე პასუხისმგებლობა სწორედ ხელისუფლებამ უნდა აიღოს.