რუსეთის საგარეო საქმეთა სამინისტროს განცხადებით, ბრიტანეთის სამაუწყებლო კორპორაცია ბი-ბი-სი-ს (BBC) მოსკოვის ბიუროს ჟურნალისტთა პირადი მონაცემების გამოქვეყნება შესაძლოა, უკავშირდებოდეს ჰაკერულ თავდასხმას, რომელიც დეკემბერში განხორციელდა ლონდონში რუსეთის საელჩოს ინტერნეტ-რესურსებზე.
სამინისტროს საიტზე გამოქვეყნებულია პასუხები შეკითხვებზე, რომლებითაც მას ბი-ბი-სი-მ მიმართა. პასუხად შეკითხვაზე, რუსეთის მთავრობის ხელი ურევია თუ არა სიის გამოქვეყნებაში, „აბსურდულს“ უწოდებენ ასეთ ვარაუდს.
სამინისტრო არ განმარტავს, რატომ ან როგორ აღმოჩნდა ლონდონში რუსეთის საელჩოს ინტერნეტ-რესურსებში ინფორმაცია ბი-ბი-სი-ს თანამშრომლების - მოსკოვში მცხოვრები რუსეთის მოქალაქეების - პირად მონაცემებზე.
25 დეკემბერს საიტებმა pikabu.ru, segodnya.ru, აგრეთვე სოციალურმა ქსელმა „ვკონტაქტე“ გამოაქვეყნეს ბიბისის 44 თანამშრომლის სია, მათი გვარ-სახელებისა და ფოტოების ჩათვლით. გამოცემა „პროექტი“ თავის წყაროებზე დაყრდნობით ამტკიცებს, რომ სია სრულ თანხვედრაშია რუსეთის საგარეო საქმეთა სამინისტროში აკრედიტებული, ბი-ბი-სი-ში დასაქმებული ჟურნალისტების სიასთან.
ბი-ბი-სი-ს რუსეთის საგრეო საქმეთა სამინისტროში გაგზავნილი აქვს ოფიციალური საჩივარი ჟურნალისტთა პირადი მონაცემების გამოქვეყნების გამო.
